iklan

EDUKASAUN, MUNISÍPIU, VIQUEQUE

ESTV Kalo Heda Uaitulari laiha profesór iha Departamentu IT

ESTV Kalo Heda Uaitulari laiha profesór iha Departamentu IT

Profesór ESTV Kalo Heda Uaitulari menus profesor Departamentu IT, difikulta ba estudante .Imajén Tatoli/Vitorino Lopes da Costa

VIQUEQUE, 18 juñu  2024 (TATOLI)-Diretór Ensinu Sekundáriu Tékniku Vokasionál (ESTV) Kalo-Heda, Postu Uatulari, munisípiu Viqueque, Zainal Abadin, informa, daudaun ne’e ESTV Kalo-Heda enfrenta problema menus profesór ne’ebé hanorin estudante iha Departamentu Informatika no Teknolojia (IT), nune’e difikulta ba estudante klase 3 ne’ebé sei partisipa ezame nasionál.

“Problema ne’ebé daudaun ami hasoru mak profesór ba departamentu IT, kuaze  ba fulan neen ona laiha profesór nune’e  estudante sira mai halimar de’it iha eskola to’o fila ba uma. Uluk ne’e profesór área espesialidade IT na’in-neen, maibé kontratu hotu iha tinan kotuk nune’e ema atu hanorin estudante sira laiha. Maske laiha profesór maibé Governu seidauk subtitui profesór ruma hodi troka profesór na’in-tolu ne’ebé kontratu hotu”,  Zainal Abadin, hateten ba jornalista sira, iha edifísiu ESTV, Mauselok, suku Matahoi, postu Uatulari, ohin.

Foin lalais eskola deside profesór na’in- rua mak taka provizóriu, maske profesór referidu la’ós área espesializada IT ne’ebé nafatin sai difikuldade liuliu ba estudante klase 3 sira-ne’ebé besik ba ezame nasionál.

“Ha’u hanoin sei bolu inan aman sira hodi deside bolu fila profesór área IT na’in-tolu hodi hanorin estudante sira, atu labele husik abandona estudante sira, ami sei buka fundu rasik fasilita  profesór sira nian transporte. Ida-ne’e ma agora planu hela atu  rezolve tanba ezame segundu trimestre mós besik ona, maibé estudante sira seidauk simu matéria”, nia akresenta.

Ho problema sira-ne’e nia parte relata direta ba servisu edukasuan munisípiu Viqeuque, maibé seidauk iha resposta ba probelma ne’ebé eskola hasoru.

Alende ne’e nia dehan, problema seluk ne’ebé eskola hasoru laiha seguransa hodi tau matan ba animál hodi labele tama no halo foer eskola ESTV Kalo-Heda.

Iha fatin hanesan Estudante Departamentu IT klase 3, Erminia Soares Pinto, sente triste tanba loron-loron bá eskola atu simu lisaun ba preparasaun ezame nasaionál, maibé to’o eskola profesór laiha.

“Loron loron ami mai eskola  halimar de’it, tanba ami-nia profesór atu hanorin área  ba IT laiha, ami  mai gasta tempu, mai profesór laiha ida-ne’e maka ami sente triste, nune’e ami husu Governu atu rezolve lalais”, nia sujere.

Tuir dadús estudante departementu IT totál na’in-45 kompostu husi klase 1 estudante na’in-13, klase 2 estudante na’in-17 no klase 3 estudante na’in-15.

Enkuantu departamentu Agraria ho totál estudante na’in-57, kompostu husi klase 1 estudante  na’in-14, klase 2 estudante na’in-23  no klase 3 estudante na’in-20.

Enkuantu totál profesór ativu hanorin  na’in-14.

Jornalista   : Vitorino Lopes da Costa

Editór         : Florencio Miranda Ximenes

 

iklan
iklan

Leave a Reply

iklan
error: Content is protected !!