iklan

EKONOMIA, HEADLINE

Natar ektare 15 iha Obrato ne’ebé abandonadu funsiona hikas

Natar ektare 15 iha Obrato ne’ebé abandonadu funsiona hikas

Diretór Nasionál Agrikultura no Ortikultura Ministériu Agrikultura no Peska (MAP), Lúcio Romeo Ribeiro. Imajen Tatoli/Natalino Belo.

DILI, 18 Juñu 2024 (TATOLI) – Natar ektare 15 iha Obrato-Manatuto, ne’ebé abandonadu durante 2020 no 2023 funsiona hikas, tanba hetan ona fornesimentu bee ho sufisiente.

Diretór Nasionál Ortikultura, Lúcio Ribeiro, informa katak agrikultór sira daudaun halo ona natar no diresaun prepara ona fini hamutuk rihun 300 hodi apoiu ba to’os-na’in sira atu kari iha sira-nia natar iha tempu besik.

“Hare sira ne’e sei kuda ba époka dahuluk tanba sira halo preparasaun ba hadi’a natar, fila rai, tanba du’ut moris nakonu iha natar laran”, diretór dehan iha Comoro, ohin.

Dirijente ne’e salienta katak bee ne’ebé fornese ba natar iha Obrato mai husi mota Sanbee Anain. Mota ne’e ekipa téknika sira halo ona normalizasaun hodi fornese de’it ba natar sira ne’ebé abandonadu iha Manatuto.

Lúcio Ribeiro realsa mós katak ho funsionamentu natar ektare 15 iha Obrato ne’e sei aumenta produsaun iha tinan ida ne’e hodi garante polítika Governu nian ba redusaun foos importasaun, nune’e produsaun rai-laran bele hetan atensaun fatin husi Governu.

Agrikultór iha Obrato José da Costa esklarese katak natar ektare 15 ne’ebé agora funsiona ne’e komunidade nian. Natar sira ne’e la uza antes akontesimentu inundasaun uha 04 Abríl, tanba bee maka la sufisiente. “Depois akontese tan ho inundasaun iha 2021 ne’e hamosu dezastre boot natar iha Obrato ne’e maran totál”, nia relembra.

Daudaun ne’e, Governu apoia ona tratór unidade tolu ba agrikultór sira iha Manatuto hodi utiliza ba fila natar sira.

“Karik ita la hetan apoiu tratór ruma husi Governu, ha’u hanoin tinan ida ne’e mós natar iha Obrato seidauk bele utiliza, tanba du’ut mak moris nakonu iha laran. Ita atu tesi de’it susar uitoan, maibé ho apoiu ekipamentu tratór unidade ne’e agora natar fila hotu ona, bee mós tama di’ak loos ona, hein de’it atu kuda”, nia  salienta.

Jornalista: Tomé Amado    

Editora: Maria Auxiliadora

iklan
iklan

Leave a Reply

iklan
error: Content is protected !!