DILI, 19 juñu 2024 (TATOLI)–Governu liuhusi Ministériu Ensinu Superiór, Siénsia no Kultura (MESSK) loke vaga bolsa estudu ba jurista 70 hodi kontinua estudu iha Portugal.
“Atu fó hanoin katak IX Governu loke hela bolsa estudu 70 ba ita-nia jurista sira-ne’ebé hakarak bá eskola iha Portugal maibé sira tenke hatene portugés di’ak, tanba eskola iha Portugal tenke iha koñesimentu di’ak ba lian portugés, ba lisensiatura nia maestradu iha Portugal tanba ita presiza reforma ida di’ak iha setór justisa,” Ministru Ensinu Superiór, Siénsia no Kultura, José Honório da Costa Pereira Jerónimo, informa ba Agência Tatoli, iha MESSK, Colmera, kuarta ne’e.
Daudaun ne’e Ministru hamutuk ho ninia tékniku sira prepara hela kondisaun hodi aselera prosesu selesaun.
“Ita hahú loke bolsa ne’e ba públiku atu sira bele tuir selesaun ne’e pur méritu, nune’e sei la haree ba timoroan sira-nia kor A ka B, maibé timoroan ne’ebé iha kapasidade di’ak no nia liu tenke ba eskola. Ida-ne’e hahú loke ona,” MESSK akresenta.
Aleinde ne’e, MESSK loke bolsa estudu ba estudante na’in-10 hodi kontinua estudu iha Combódia.
“Sira seidauk arranka, ami bolu tiha inan-aman mai iha ne’e, ami esplika tiha ona, sira sei ba iha fulan-setembru ou outubru hodi bá eskola iha ne’ebá, Governu Cambódia mak fó bolsa estudu ne’e,” Ministru informa.
MESSK koopera hamutuk ho Fundu Dezenvolvimentu Kapitál Umanu (FDCH, sigla portugés) hodi loke vaga ba públiku.
“Ita mós agora serbisu hamutuk ho FDCH, ita loke hela vaga 33 ba timoroan sira-ne’ebé hakarak atu bá kontinua iha Malazia iha área Enjeñaria no Turizmu. Enkuantu, na’in-10 bá Tailándia mós loke hotu ona. Husu ba joven timoroan sira hotu ne’ebé iha kapasidade di’ak bele kompete bolsa ne’e iha FDCH,” nia tenik.
Iha sorin seluk, bolseiru na’in-rua ne’ebé kontinua estudu iha Brunei Darussalam, arranka ona iha semana kotuk.
“Agradese ba empreza Dayko husi Brunei, Governu liu-liu ministériu agradese tebes, ha’u ko’alia ba sira, agradese tebes ba ema laran di’ak sira tanba sira fó bolsa estudu ba ita-nia oan sira. Ita presiza nakloke ba nasaun sira seluk, liu-liu país sira-ne’ebé iha ASEAN tanba ita hanoin atu tama asosiasaun ne’e presiza prepara rekursu ne’ebé mais adekuadu atubele kompete iha nível rejionál, internasionál no nasionál,” Governante ne’e dehan.
Jornalista : Osória Marques
Editora : Julia Chatarina
