iklan

INTERNASIONÁL

Governu Myanmar hala’o sorumutu ho PR hodi diskute kooperasaun bilaterál

Governu Myanmar hala’o sorumutu ho PR hodi diskute kooperasaun bilaterál

Ilustrasaun

DILI, 19 juñu 2024 (TATOLI) – Governu liuhusi Ministru Negósiu Estranjeiru Myanmar nian Zin Mar Aung no Ministru Uniaun liuhusi Ministru Saúde no Ministru Edukasaun Myanmar, Zaw Wai Soe, hala’o sorumutu ho Prezidente Repúblika José Ramos Horta hodi diskute kona-ba demokrasia no kooperasaun iha setór edukasaun no saúde entre nasaun rua ne’e.

 

“Ami hasoru malu ho Prezidente Repúblika Timor-Leste hodi atualiza situasaun iha Myanmar no progresu servisu sira ne’ebé mak iha to’o ami hetan susesu. Iha tempu hanesan, ami mós ko’alia kona-ba oinsá atu mantein relasaun entre Timor-Leste no Myanmar, liuliu ho Governu nasionál no komunidade sira, tanba ne’e ami mós hakarak agradese ba Prezidente Timor-Leste tanba advokasia ba povu Myanmar nia naran no ami-nia revolusaun nian,” Ministru Negósiu Estranjeiru Myanmar nian Zin Mar Aung, ba jornalista sira hafoin enkontru iha Palásiu Prezidensial Dili, ohin.

 

Diplomata ne’e dehan, situasaun agora daudaun iha Myanmar, kompara ho tinan hirak uluk nian, hetan kontrolu tebes nune’e Governu Myanmar mós bele fornese servisu públiku no asisténsia umanitária ba ninia povu.

 

“Agora dadaun, Governu Myanmar kontrola no fornese ona servisu públiku no asisténsia komunitária no koko atu normaliza moris loroloron ba povu sira, maibé dezafiu ne’ebé sosiedade sira hetan mak atake aereu no atake diskriminatóriu ne’ebé militár hasoru,” nia dehan.

 

Iha fatin hanesan, Ministru Uniaun nian Ministru Saúde no Ministru Edukasaun Governu Unidade Nasionál Myanmar nian, Zaw Wai Soe, haktuir, sorumutu ne’e mós ko’alia kona-ba relasaun entre TL no Myanmar iha setór edukasaun no saúde iha futuru.

 

“Ha’u sente onra tebes tanba ha’u hela iha Palásiu Prezidensiál, no ida-ne’e mós hanesan oportunidade ida ba ita-nia Governu, ba iha unidade nasionál nian,” Zaw Wai Soe konklui.

 

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!