Top

Komisaun A husu MJ tau atensaun ba uniforme guarda prizionál Gleno

Guarda-prizionál Gleno no Becora, iha ámbitu workshop kona-ba ‘Optimaliza kbiit lideransa, psikososiál no komunikasaun efetivu ba guarda-prizionál haree husi ókulu direitu umanu’, iha JL Vila, sesta (14/4/2023). Imajen Tatoli/António Gonçalves

DILI, 19 juñu 2024 (TATOLI)—Komisaun A ne’ebé trata asuntu Justisa no Konstituisionál iha  Parlamentu Nasionál (PN), husu ba Ministériu Justisa (MJ) atu tau atensaun ba uniforme guarda prizionál iha prizaun  Gleno, munisípiu Ermera.

Komisaun A, lideradu husi Prezidente Komisaun, Patrocínio dos Reis Fernandes, akompaña husi Deputadu membru komisaun, iha fulan-maiu tinan ne’e hala’o fiskalizasaun ba prizaun Gleno hodi haree kondisaun no situasaun iha ne’eba.

“Rekomenda ba Ministériu Justisa atu urjentemente hodi haree uniforme ba guarda prizionál, tanba simu preokupasaun barak ba kestaun ne’e,” refere relatóriu komisaun A ne’ebé Agência Tatoli asesu, kuarta ne’e.

Aleinde ne’e, Komisaun A mós rekomenda ba MJ atu kontrola másimu ba kompañia fornesedór ai-han ba prizoneiru, tanba komisaun deteta iha prizaun Gleno ba hahán loro-loron la reflete item ne’ebé iha.

Enkuantu, komisaun hala’o vizita fiskalizasaun ba munisípiu Ermera, iha ne’ebé rona mós parte dirijente prizaun Gleno hato’o katak  guarda prizionál hahú serbisu iha 2002 to’o agora mantein nível II no grau F iha dekretu-lei númeru 10/2012, Estatutu Guarda Prizionál maibé la implementa.

“Pedidu matéria ijéne no fatin kuziña laiha kondisaun no kompaña fornesedór hahan laiha kualidade, husu atu halo subtituisaun hodi iha kualidade hahan ne’ebé di’ak,” relatóriu ne’e haktuir.

Aleinde ne’e, dirijente prizaun hato’o ba Komisaun A katak laiha karreta operasionál hodi transporta prizoneiru mai Dili hodi tuir julgamentu, tanba dezde 2008 karreta la sujeita intervensaun manutensaun.

Enkuantu, relatóriu fiskalizasaun Komisaun A nian, meza PN hala’o ona distribuisaun iha reuniaun plenária PN iha 18 juñu 2024 hodi hato’o kópia ba ezekutivu, atu tau atensaun ba rekomendasaun ne’ebé durante fiskalizasaun rekolla iha terrenu.

Jornalista : Nelson de Sousa

Editór        : Cancio Ximenes   

Publisidade

Leave a Reply

Latest Post

error: Content is protected !!