iklan

EKONOMIA, MUNISÍPIU, VIQUEQUE

Marsu to’o Juñu, Autoridade Uma Uain-Kraik rejista fahi mate tanba moras hamutuk 200

Marsu to’o Juñu, Autoridade Uma Uain-Kraik rejista fahi mate tanba moras hamutuk 200

Haki'ak na'in-tuur besik nia fahi mate ho triste. Imajén Tatoli/Vitorino Lopes da Costa

VIQUEQUE, 19  juñu 2024 (TATOLI)- Xefe Aldeia Fatu-hadan, Suku Uma Uain-Kraik, Rogero de Araújo Soares, husu Governu liuhusi Ministériu Agrikultura Peskas, Pekuária no Floresta (MAPPF) atu fó asisténsia téknika liuliu vasina ba fahi sira tanba daudaun komunidade sira iha área Fatu-Hadan sira fahi mate barak kuaze 200-resin.

Tuir dadús fahi mate hahú fulan Marsu to’o Juñu 2024 purvolta 200 resin husi uma-kain 157 ne’ebé durante ne’e haki’ak animál liuliu fahi.

Ohin loron ami-nia fahi mate barak loos, kauza ba peste fahi nian tanba ne’e maka mate ne’e.  Maibé, ami laiha ai-moruk ida hodi fó tratamentu ba ami-nia fahi atu labele mate. Tanba ne’e ami husu Governu mai halo vasinasaun ba komunidade sira-nia fahi ne’ebé balun sei moris”,  Rogero de Araújo Soares, hateten ba Agência Tatoli, iha postu Viqueque Vila, foin lalais ne’e.

Maske, nia dehan informa ona ba parte saúde animál munisípiu Viqueque, maibé seidauk iha resposta hodi halo vasinasaun ba komunidade sira fahi.

“Ami-nia fahi mate hahú iha fulan Marsu to’o agora. Molok atu mate ita haree fahi oin bulelu, lakle’ur mate ne’ebé ami lori soe tiha de’it. Ho preokupasaun komunidade sira-nia fahi mate ne’e maka ha’u nu’udar autoridade fó hatene parte pekuária munisipál oinsá sira halo atensaun ba fahi, maibé seiduak fó resposta ruma ba ami”, nia lamenta.

Iha fatin hanesan, komunidade aldeia Fatu-dahan, Duaerte De Araújo, husu mós ba governu liuhusi Ministériu Agrikultura , Peska, Pekuária no Floresta (MPPF) atu fó asisténsia lalais tanba sira nia fahi komesa mate barak ona.

“Ami nia moris mak haki’ak fahi, maibé pesti ne’e mosu halo ami-nia fahi mate moos. Ha’u-nia hamutuk 11, maioria mate hotu laiha ida maka moris. Pesti ne’e da’et lalais, ita haree fahi ninia fulun kuandu hamrik ne’e lakle’ur mate ona”, nia afirma.

Alende ne’e, Xefe aldeia Naeboruk, suku Uma Uain Krai, postu Viqueque Vila, munisípiu Viqueque, Maria Sekitar Piedade, informa, dadauk komunidade sira-nia fahi ne’ebé mate rejista hamutuk 87 hahú fulan Janeiru to’o fulan Juñu 2024.

“Ha’u sente triste tebes bainhira komunidade sira hato’o sira-nia halerik fahi mate iha tinan ida-ne’e. Komunidade sira hakiak fahi ne’e maka sustenta ba sira-nia família no ba balu selu sira-nia oan eskola, maibé pesti fahi ne’ebé sei afeta ba komunidade sira-nia fahi”,Maria Sekitar Piedade, jornalista sira, iha sede aldeia Naeboruk, suku Uma Uain Kraik, ohin.

Hatán ba preokupasaun ne’e,  Xefe Departamentu Pekuária no Veternária Servisu Agrikultura Munisípiu Viqueque, Eugenio Pinto, hateten, to’o agora seidauk simu informasaun kona-bá komunidade sira-nia fahi mate.

“Maske ami seidauk rona, maibé ami husu ba komunidade sira-ne’ebé haki’ak animál hanesan fahi, manu no karau ne’ebé moras direta mai fó hatene ami. Atu ami bele tun hodi fó atendimentu sedu ba komunidade sira-nia preokupasaun”, nia afirma.

Nia dehan, postu Viqueque Vila suku hamutuk 10 ne’e, departamentu Pekuária no Veternária  koloka tékniku hamutuk na’in-4 ne’ebé atu tau matan komunidade sira-nia animál sira-ne’ebé moras.

“Tanba ita mós iha ai-moruk ba vasina hodi ajuda komunidade sira, bainhira hetan fahi moras manu moras. Liuhusi autoridade sira mai relata ba ami, mak ita foin tun ba halo vasinasaun”, nia promote.

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!