iklan

EDUKASAUN, HEADLINE

Reitór foun UNITAL komprometidu prodús estudante ho kualidade

Reitór foun UNITAL komprometidu prodús estudante ho kualidade

Reitór foun UNITAL, Joaquim de Jesus Vas. Imajen/Osória Marques

DILI, 19 juñu 2024 (TATOLI)–Reitór foun Universidade Orientál Timor-Lorosa’e (UNITAL), Joaquim de Jesus Vas, komprometidu sei prodús estudante sira ho kualidade hodi bele kontribui ba dezenvolvimentu nasionál iha Timor-Leste.

“Iha ha’u-nia mandatu ha’u promete no sei esforsu hodi prodús estudante sira ho kualidade, nune’e mós universidade iha knaar tomak atu prodús rekursu umanu ne’ebé estandarizasaun ho kualidade di’ak atubele kontribui ba dezenvolvimentu nasionál iha ita-nia rai doben Timor-Leste nian. Tanba atu dezenvolve ita-nia rai ho di’ak, ita-nia universidade iha responsabilidade boot hodi kria kondisaun no kualidade atu nune’e bele fó espasu ba ita-nia joven sira hetan edukasaun ho padraun kualidade ne’ebé di’ak atu kontribui ba ita-nia rai,” Reitór foun UNITAL, hateten, hafoin simu pose ba períodu 2024-2027, iha auditóriu UNITAL, kuarta ne’e.

Nia konsidera, atu dezenvolve UNITAL presiza estrutura nia kolaborasaun serbisu hodi halo mudansa.

“UNITAL iha paradigma foun ne’ebé entrega pasta Reitór nia mai atan ha’u. Ha’u sei serbisu hamutuk ho ema hotu nune’e bele dezenvolve UNITAL sai di’ak, Reitór mesak labele halo buat ida. Tanba ne’e ha’u husu ba estrutura tomak no parseria sira hotu, mai ita serbisu hamutuk hodi dezenvolve ita-nia rai liuhusi ita-nia universidade ho edukasaun ne’ebé iha,” nia akresenta.

Aleinde ne’e, prodús estudante ho kualidade liuhusi rekursu umanu ne’ebé iha, tau atensaun mós ba siénsia, peskiza no servisu komunitáriu sira.

“Tanba ne’e, iha ha’u-nia mandatu ita sei la sees husi tridal universidade nian, ne’ebé mak ko’alia kona-ba siénsia, peskiza no servisu komunitáriu. Tanba ita hatene katak UNITAL nu’udar universidade privada ne’ebé ho estudante barak, nune’e ba oin UNITAL sei serbisu no kolabora hamutuk ho instituisaun Governu no naun governamentál sira inklui mós ho universidade sira seluk no sei hadi’a mós sistema reforma, administrativu, jestaun no finanseiru. Tanba tempu to’o ona UNITAL mós avansa ba oin hanesan universidade sira seluk,” nia esplika.

Nune’e mós, Prezidente no Fundadór UNITAL, Majór Jenerál Cornélio Ximenes ‘Maunana’, husu Reitór foun atu serbisu ho responsabilidade tomak hodi hadi’a jestaun administrasaun sira durante iha nia mandatu.

“Ba Reitór foun tenke hadi’a jestaun administrasaun, funsionamentu ho kualidade ho responsabilidade tomak, hahú husi Reitór foun to’o mai Dosente. Presiza halo mudansa hodi hatán ba ezijénsia kualidade edukasaun ho padraun mundiál hodi bele kompete iha kompetisaun nasionál no internasionál,” Maunana dehan.

Notísia relevante : Prezidénsia Repúblika apoiu ekipamentu desportu-livru ba UNITAL

Tuir Maunana, UNITAL nu’udar universidade ida-ne’ebé mak fó mós nia kontribuisaun ba nasaun, liuhusi prepara rekursu umanu iha área oin-oin, nune’e presiza halo mudansa tanba iha Reitór sesante nia mandatu no serbisu barak ne’ebé mak la ezekuta.

“Fundasaun lamenta tebes no ezijénsia ba Reitór foun katak ba futuru presiza tau atensaun ba relatóriu mensál, trimestrál no anuál. Tanba orsamentu sei la’o tuir dalan administrasaun finanseiru nian. Reitór sesante ne’e ema di’ak maibé nia frakeza iha implementasaun orsamentu, durante tinan-lima ne’e iha buat barak mak nia halo no iha mós buat barak ne’ebé mak nia la halo. Reitór sesante iresponsabilidade iha jestaun administrativu. Husi iresponsabilidade ida-ne’e mak afeta ba dezentendementu UNITAL nian, nune’e fundasaun halo ezonerasaun ba Reitór sesante no hili fali foun,” nia konta tuir.

Fundasaun la nega Reitór sesante nia esforsu, serbisu no nia kontribuisaun tomak, maibé tempu mós to’o ona atu UNITAL ne’e halo mudansa.

“Tanba ne’e mak ita hili fali Reitór foun tanba atu hatan ba kualidade edukasaun globál ita tenke halo mudansa ba estrutura hodi prepara rekursu umanu kualifikadu tuir ezijénsia edukasaun globál nia nesesidade urjénsia,” nia tenik.

Reprezentante Ministériu Ensinu Superior Siénsia no Kultura (MESSK), Teresa de Carvalho, parabeniza Reitór foun UNITAL no ho esperansa katak Reitór foun bele halo serbisu ho di’ak. Nune’e mós agradese ba Reitór sesante ne’ebé hala’o ona serbisu hotu ne’ebé iha maski iha difikuldade barak ne’ebé nia hasoru.

“Ha’u fó parabéns ba ba magnifiku reitór ho nia estrutura no direjente sira hotu iha UNITAL. Espera katak ho misaun ida-ne’e bele servisu hamutuk ho di’ak no susesu. Biban ne’e ha’u mós agradese ba servisu ne’ebé magnífiku reitór sesante halo, maske nia hasoru difikuldade oin-oin maibé nia konsege halo servisu lubuk ida,” nia informa.

Nia esplika, planu Estratejiku Dezenvolvimentu Nasionál, tinan 2000-2030, rekoñese katak rekursu umanu sai fatór importante tebes ho objetivu dezenvolvimentu sustentável iha nasaun Timor-Leste.

“Tanba ne’e iha ámbitu ida-ne’e IX Governu konstituisionál konsidera katak setór edukasaun hanesan prioridade no interesse Nasionál. Nune’e ita presiza asegura formasaun ho kualidade, no atu prepara graduadu ne’ebé iha kualifikadu no tenke profesionál ho adekuadu hodi hatán ba merkadu traballu. Só nune’e mak jerasaun foun kontribui direita ba ekonómiku sustentável ba ita-nia rai doben Timor-Leste. Dadus ne’ebé mak MESSK iha estudante maizumenus rihun 45 mak gradua ona. Ho ida-ne’e MESSK hakarak kolabora ho Institutu Ensinu Superiór sira hotu hodi promove kolaborasaun,” nia tenik.

Estudante UNITAL, Angelo Vieira da Costa Soares, ho esperansa katak Reitór foun ne’e bele serbisu hamutuk ho nia estrutura tomak hodi rezolve problema infraestrutura sira iha universidade referidu.

“Hanesan estudante ativu ne’ebé oras ne’e daudaun hala’o hela estudu iha UNITAL, espera Reitór foun ne’e tenke serbisu hamutuk ho estrutura universidade ho di’ak no responsabilidade hodi bele atinje moto universidade ninian, nomós hodi bele rezolve estudante sira-nia preokupasaun iha prosesu aprendizajen hanesan, menus saladeaula no fasilidade prátika nian,” nia tenik.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!