iklan

NASIONÁL, INTERNASIONÁL, HEADLINE, POLÍTIKA, SAÚDE

Xefe Estadu ho Embaixadora Kuba diskute kooperasaun billaterál

Xefe Estadu ho Embaixadora Kuba diskute kooperasaun billaterál

Embaixadora Cuba, Grisel Alina Aldama Innis. Imajen Tatoli /Egas Cristovão

DILI, 19 juñu 2024 (TATOLI) – Prezidente Repúblika, José Ramos Horta,  kuarta ne’e iha Palásiu Prezidensiál Dili simu vizita husi Embaxadora Kuba iha Timor-Leste, Grisel Alina Aldama Inniss, hodi diskute no halo revizaun ba kooperasaun billaterál ne’ebé nasaun rua halo ona durante ne’e.

“Vizita ida ne’e fó oportunidade hodi halo revizaun kona-ba kooperasaun bilaterál entre nasaun rua, hodi foku iha área sira ne’ebé Kuba fó apoiu maka’as, partikularmente iha área saúde nian. Ami diskute mós oinsá atu buka dalan hodi hadi’a no aumenta koperasaun ida ne’e ba área foun,” Embaixadora ne’e hatete ba jornalista sira hafoin remata reuniaun ho Xefe Estadu.

Durante enkontru, parte rua ko’alia mós  kona-ba koperasaun istóriku, ne’ebé marka ona tinan 20 husi apoiu kontínua Brigada Médika Kubanu iha Timor-Leste.

“Prezidente Ramos Horta apresia ba kontribuisaun Kuba nian ba setór saúde, fó mós formasaun importante ba médiku Timor oan sira. Koperasaun ida ne’e hetan rezultadu médiku Timoroan treinadu liu rihun ida, ho barak halo ona espesializasaun iha área sira hanesan ginekolójia, ortopédiatria, no neonatolójia,” Embaxadora ne’e katak.

Esforsu ne’ebé Kuba halo hodi apoiu Timor-Leste hanesan meiu ida hodi tulun médiku Timoroan sira nune’e sai profesionál liutan hodi halo atendimentu ne’ebé di’ak ba komunidade sira.

Aleinde ne’e, diskusaun sira-ne’e inklui mós troka kultura no edukasaun, ho asina memorandu entendimentu ida ba estudante timoroan sira atu estuda arte iha Kuba.

Hahú iha fulan-agostu, grupu dahuluk husi estudante Timoroan sira sei hahú sira-nia edukasaun superiór iha dansa, múzika no teatru iha instituisaun sira ne’ebé boot iha Kuba.

Kolaborasaun ida-ne’e la’os de’it kuidadu saúde nian, ne’ebé envolve Asesór desportu Kubanu sira, servisu hamutuk ho Universidade Nasionál Timor-Lorosa’e (UNTL) ne’ebé kontribui ba dezenvolvimentu desportu lokál sira.

Jornalista: Hortencio SanchezEditór: Florencio Miranda Ximenes

iklan
iklan

Leave a Reply

iklan
error: Content is protected !!