COVALIMA, 20 Juñu 2024 (TATOLI) – Floresta Covalima kontribui, entre Janeiru no Juñu, reseita hamutuk $ 7.250 ba kofre Estadu, informa Xefe Departamentu Reflorestasaun Territoriál, Floresta no Planta Industriál Covalima, Domingos Gusmão.
Reseita ne’e mai husi komunidade ne’ebé fa’an ai-teka ba empreza sira hodi ko’a ba halo negósiu ho totál kúbiku hamutuk 290, ne’ebé kada kúbiku selu $25.
Domingos Gusmão esplika katak empreza ne’ebé atu ko’a ai ba halo negósiu presiza hasai lisensa husi Floresta, liuhusi hato’o pedidu hafoin hasai despaixu, nune’e guarda florestál sira bá observa hodi relata ba nasionál.
“Durante ne’e, empreza sira halo negósiu ba ai indústria ka ai-teka, tanba abitante ida bele kuda ai-teka iha to’os ho hun 30 ba leten, nune’e Floresta Covalima kontribui reseita ba kada tinan aumenta”, nia dehan.
Dirijente ne’e halo komparasaun katak entre Janeiru no Juñu 2023 ne’e, Floresta Covalima kontribui de’it reseita $5.067, maibé iha tinan 2024, iha fulan neen rekolla ona $7.250.
Prezidente Autoridade munisípiu Covalima, Miguel Armada Cardoso, admite katak munisípiu ne’e potensiál ba ai-teka, liuliu iha postu Zumalai no Tilomar.
“Ita potensiál ba ai-teka, nune’e presiza atu kuidadu didi’ak no ai-teka sira ne’e sei la fó ba sé de’it, maibé Covalima mak jere rasik hodi bele hetan osan”, nia apela.
Jornalista:Celestina Teles
Editora: Maria Auxiliadora
