DILI, 20 juñu 2024 (TATOLI)— Ministériu Edukasaun (ME) liuhusi Institutu Nasionál Formasaun Dosente no Profisionál Edukasaun (INFORDEPE), sesta ne’e, fó formasaun kona-ba koñesimentu lian ba profesór na’in-31 husi Eskola Sekundáriu Tékniku Vokasionál (ESTV).
“Ita fó formasaun kona-ba língua ba ita-nia profesór hamutuk 31, ne’ebé hanorin iha Eskola Sekundária Tékniku Vokasionál Claret, Zumalai, Cristal no Akar-laran iha munisípiu Covalima,” Prezidente INFORDEPE, Domingos Martins, informa iha ninia knaa fatin, Balide, kinta ne’e.
Nune’e, nia husu ba formandu sira ne’ebé maioria joven ne’e atu aproveita didi’ak tempu.
“Mesak profesór foin-sa’e hotu de’it, nune’e aproveita didi’ak oportunidade ida-ne’e hodi hakle’an ita-boot sira-nia koñesimentu iha área língua nian hodi transforma ita-nia oan sira liuhusi esperiénsia no matenek ne’ebé ita-boot sira iha,” nia enkoraja.
Formasaun realiza durante loron-lima, hahú segunda to’o sesta, ho durasaun oras 40 nia-laran.
Notísia relevante : TLCE identifika maioria ESTV menus fasilidade prátika
Sekretáriu Estadu Ensinu Sekundáriu Jerál no Ensinu Tékniku Vokasionál (SEESJ-ESTV), Domingos Lemos Lopes, hateten, kursu ne’e hodi fasilita formandu sira hakle’an liután lian portugés, ne’ebé hanesan instrumentu forte tebes hodi loke horizonte foun sira iha karreira hanorin nian.
“Kobre módulu ida-idak husi kursu ne’e importante hodi haburas susesu profisionál. Esperiénsia no dedikasaun mak baze ba programa ne’e, nune’e formasaun durante loron-lima ne’e sei sai hanesan modelu ne’ebé ajuda atu forma futuru edukasaun iha eskola Téknika Vokasionál iha komunidade nia le’et,” nia tenik.
Aleinde ne’e, kursu ne’e la’ós de’it forma simples no selebra koñesimentu, maibé hakarak atu aumenta koñesimentu.
“Ha’u enkoraja imi atu aproveita dalan ne’e iha momentu hotu. Mai ita ko’alia, husu, no liu-liu fó inspirasaun ba malu. Hamutuk, ita sei hametin kualidade hanorin iha lian portugés no iha fatin hanesan, haforsa edukasaun ba ita-nia estudante sira entusiazmu lian hodi dezenvolve lian iha semana ida hodi transforma aprendizajen,” nia dehan.
Jornalista : Osória Marques
Editora : Julia Chatarina
