VIQUEQUE, 20 juñu 2024 (TATOLI)- Xefe Suku Irabin de Baixo, Postu Administrativu Uatucarbau, munisípiu Viqueque, José Baptista do Carmo, informa, udan-boot foin lalais ne’e sobu kanal irrigasaun liga ba natar Baidubu hamutuk ektare 150.
“Daudaun ita-nia agrikultór hare kuda hotu ona, maibé irrigasaun mota estragu tiha ne’ebé bee latun ba natar. Nune’e bee iha natar Baidubu no Lawadare maioria maran hodi fó impaktu ba hare sira ne’ebe komunidade kuda ona. Tanba ne’e, presiza halo normalizasaun ba kanal irrigasaun hodi bele distribui lalais bee ba natar Baidubu”, José Baptista do Carmo, hateten ba jornalista Agência Tatoli, iha postu Uatucarbau, ohin.
Tuir dadús irrigasaun Irabere liga ba natar Baidubu ho totál ektre 150 no liga mós ba natar Lawadare ektare 25, natar Kainunu purvolta 40 ektare, husi natar sira-ne’e benefísia ba total uma-kain 500 iha sukun Irabin de Baixu no suku lima seluk iha postu Uatucarbau.
“Tanba ne’e, ami husu ba Ministru Agrikutór atu mobiliza ekipamentu pezadu ruma atu halo normaliza ba kanal irrigasaun Irabere ne’ebé agora rai taka hotu kanal irigasaun. Parte estesionista Agrikultura iha postu Uatucarbau mós haree ona, espera tempu badak bele rezolve lalais atu responde komunidade agrikultór sira-nia preokupasaun”, nia sujere.
Iha fatin hanesan, Asosiasaun Irrigasaun Baidubu, João Xavier, haktuir, nia-parte relata ona ba MAPPF atu rezolve liuliu hasai sedimentasaun ne’ebe nakonu iha kanal irrigasaun iha mota Irabere.
“Natar Baidubu agora bee maran ne’ebé kauza husi mota mak estraga hela de’it. Agrikultór sira ba kee duni, maibé bee estraga hela bei-beik. Ami asosiasaun informa ona ba diresaun hodi halo normalizasaun hodi bee tama fila-fali ba natar sira ”. nia hato’o.
Tuir dadús populasaun suku lrabin de Baixo ho na‘in-2.624, kompostu husi aldeia hitu hanesan aldeia Betoria na‘in-175, Lacolorohoo na’in-423, Macaqui na’in-305, Macausa nain-236, Taradiga nain-338, Taradai na’in-499 no Uatudere na‘in-252.
Jornalista : Vitorino Lopes da Costa
Editór : Florêncio Miranda Ximenes
