iklan

NASIONÁL, DILI, HEADLINE, POLÍTIKA

PR Horta husu halo auditoria ba IP ho EP ne’ebé la fó benefísiu ba Estadu

PR Horta husu halo auditoria ba IP ho EP ne’ebé la fó benefísiu ba Estadu

Prezidente Repúblika, José Ramos Horta. Imajen Tatoli/Egas Cristóvão.

DILI, 20 juñu 2024 (TATOLI)– Prezidente Repúblika, José Ramos Horta, husu ba Governu liuliu Primeiru-Ministru, Kay Rala Xanana Gusmao, atu halo auditoria kompletu ba Institutu Públiku (IP) no Empreza Públiku (EP) hirak ne’ebé utiliza osan boot, maibé la fó benefísiu ba Estadu.

“Tenke halo auditoria kompletu ba IP no EP sira, tanba sira balun nia saláriu boot liu Prezidente Repúblika no Primeiru-Ministru, maibé kada tinan la hatama reseita boot ba Estadu, ida ne’e ha’u husu ona ba Primeiru-Ministru katak IP no EP barak demais, maibé barak liu mak IP, se ita mantein nune’e ita nia osan sei mohu,” Xefe Estadu hateten ba jornalista sira iha Palásiu Prezidensiál Dili, kinta ne’e.

Tuir nia, IP ho EP tenke hatama osan boot ba Estadu, nune’e labele fó prejuizu ba Estadu, bainhira la hatama osan boot ba Estadu mak sei halo mohu Estadu nia osan saugate.

“Iha nasaun seluk IP ho EP serbisu maka’as hanesan, eletrisidade hatama osan boot ba Estadu, Bee-moos hatama osan boot ba Estadu, maibé ita nian hatama osan maibé la boot liu ne’ebé Estadu selu ba sira, di’ak liu hamenus sira nia osan tuir saida mak sira hatama,” Xefe Estadu rekomenda.

Tanba ne’e,  Prezidente Repúblika sei haree didi’ak Orsamentu Jerál Estadu (OJE) 2025 antes halo aprovasaun.

“Orsamentu 2025, ha’u sei haree didi’ak, se la muda vensimentu ba IP no EP sira ne’ebé la hatama retornu ba Estadu ha’u rasik sei veta orsamentu, ha’u sei lee, osan hira mak ba IP no EP sira, sira nia Diretór ou Prezidente no funsionariu sira nia salariu hira, sira ne’e hotu tenke tun,” nia tenik.

Notisia relevante: http://Governu sei reforma I.P ho E.P ne’ebé ho tabela salariál boot

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!