iklan

EKONOMIA, HEADLINE, INKLUZAUN SOSIÁL, MUNISÍPIU, OÉ-CUSSE (RAEOA)

APC Oé-Cusse sei estabelese sentru evakuasaun provizória iha Bansone

APC Oé-Cusse sei estabelese sentru evakuasaun provizória iha Bansone

Komandante Autoridade Protesaun Sivíl RAEOA, Inspestór Polísia Herman Metan, hamutuk ho Autoridade RAEOA liuhusi Asesór ba Asuntu Sosiál, Agustinho Caet kinta ne’e, observa fatin   estabelese sentru evakuasaun provizória ba vítima dezastre naturál iha sentru formasaun Bansone suku Lalisuk sub-rejiaun Pante Makasar. Imajen Tatoli/Abílio Elo Nini.

OÉ-CUSSE, 21 juñu 2024 (TATOLI) – Komandante Autoridade Protesaun Sivíl (APC) Rejiaun Administrativa Espesiál Oé-Cusse Ambeno (RAEOA), Inspestór Polísia Herman Metan, hamutuk ho Autoridade RAEOA liuhusi Asesór ba Asuntu Sosiál, Agustinho Caet kinta ne’e, observa fatin estabelese sentru evakuasaun provizória ba vítima dezastre naturál iha sentru formasaun Bansone, suku Lalisuk, sub-rejiaun Pante Makasar.

Notísia relevante: Protesaun Sivíl rejista uma 14 iha Pássabe presiza rekuperasaun

Komandante Autoridade Protesaun Sivíl Oé-Cusse, Inspestór Polísia Herman Metan, fó sai, sentru evakuasaun ne’e, apoia másima husi Ajénsia Organizasaun Internasionál ba Migrasaun (IOM) nune’e bele hatán ba situasaun emerjénsia bainhira akontese dezastre naturál iha Oé-Cusse.

“Ita kria kondisaun mínimu ba futuru iha dezastre karik, ita bele akumula ita-nia komunidade hodi tau sira iha fatin dignu atu hases husi fatin perigu, tan ne’e mak IOM apoia fasilidade no halo reabilitasaun ba sala balun ho rampa atu harii iha ne’e, ohin ita observa hamutuk ho kompañia atu halo serbisu ne’e,” Herman Metan hateten.

Komandante APC ne’e, rekoñese durante ne’e Oé-Cusse seidauk iha sentru evakuasaun própriu maibé parseiru lokál sira, prepara fatin públiku sira hanesan sede suku no eskola, atu atende karik iha situasaun emerjénsia bele evakua bele hela ho seguru.

Asesór ba Asuntu Sosiál hosi Gabinete Prezidente Autoridade RAEOA, Agustinho Caet, prontu fasilita fatin nune’e ba futuru bele sai sentru atendimentu ba komunidade sira ho dignu.

“Autoridade fasilita no oferese de’it sentru ne’e, tan ne’e mak ohin ita mai haree fatin atu halo reabilitasaun sentru evakuasaun ba vítima dezastre naturál, tanba tinan barak ona Oé-Cusse seidauk iha sentru apropriadu ida ho dignu, nune’e  bele trata ita-nia povu sira bainhira hetan dezatre naturál,” nia dehan.

Efren Manezes Martins Bareto, reprezenta Ajénsia IOM, fó sai, fundu ne’ebé IOM utíliza ba apoia evakuasaun provizória ne’e, hamutuk rihun US$19, kabe ba kontrusaun reabilitasaun, rampa ba ema dizabilita bele asesu, suplai tanki-bee ho ekipamentu balu.

“Durasaun tempu serbisu durante fulan rua, hahú jullu sei termina iha agostu 2024 ne’e, ne’ebé ezekuta husi kompaña Hilobadi Unipesoál Lda,” nia informa.

Notísia relevante: SEPS husu Autoridade apoia rai konstrui eskritóriu Protesaun Sivíl iha Oé-Cusse

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!