CVTL husu Governu investe-estabelese “Banco de Sangue” iha Baucau-Bobonaro-RAEOA
DILI, 21 juñu 2024 (TATOLI)–Sekretáriu Jeral Cruz Vermelha Timor-Leste (CVTL), Luís Pedro Pinto, husu Governu atu bele investe iha rekursu hotu-hotu hodi bele estabelese Banco de Sangue iha ospitál referál sira hanesan iha Baucau, Bobonaro, Covalima no Rejiaun Administrativa Espesial Oé-Cusse (RAEOA).
Nia esplika, CVTL iha planu servisu hamutuk ho Ministériu Saúde hodi mobiliza raan atu foti raan no fó raan iha ospitál referral sira, tanbasá mak atu foti raan ne’e tenke lori mai Dili no la tau iha kada ospitál referral.
“Tuir ami-nia observasaun, moras sira presiza raan tenke lori mai iha Dili. Ami-nia espetativa mak mobilizasaun raan ne’e pelumenus iha, tenke iha mós ospital referral sira hodi bele halo asisténsia ba munisipiu sira-ne’ebé mak tutela ba ospital referral nsira-ne’e,” Sekretáriu Jerál Cruz Vermelha Timor-Leste (CVTL), Luís Pedro Pinto, hatetem ba Agncia Tatoli iha Colmera, sesta ne’e.
CVTL identifika ona buat barak iha kada munisipiu ka ospitál referral sira-ne’e, pelumenus iha infraestrtura adekeuadu, koñesimentu iha sentidu rekursu umanu no ekipamentu adekuadu.
“Ami-nia mehi boot hakarak mobiliza doasaun raan iha munisipiu hotu-hotu, liuliu mak iha ospitál rejionál ne’ebé iha, maibé depende ba iha planu Governu nian. Ami labele la’o mesak. Se Governu iha planu ami espande ba iha ne’eba,” nia dehan.
Nia esplika, parseiru sira CVTL nian hanesan Cruz Vermelha hosi Indonézia no Tailándia iha kompromisu atu fó kapasitasaun ba sira, maibé Governu mós loke liman tau planu ba munisipiu sira-ne’e.
Tuir nia, CVTL iha funsionáriu sira treinadu ba jestaun raan no analiza raan nomós iha oportunidade formasaun, maibé ami laiha fundu hodi mobiliza. Iha futuru, CVTL mós halo kolesaun raan rasik hodi fornese ba iha HNGV.
“Iha nesesidade barak, asidente barak operasaun barak iha ospitál refererál sira, ha’u fiar katak halo mós operasaun. Estoke raan ne’e iha sufisiente ka lae. Ida-ne’e pergunta ba ita hotu. Hanoin ida tau iha prioridade mós, tanba ne’e relasiona ho komunidade nia vida. Tanba, buat ida foti ema-nia raan, konvense ema-ne’e susar la halimar,” nia dehan.
Jornalista : Jesuína Xavier
Editór : Cancio Ximenes
