CVTL mobiliza ema 50 halo doasaun raan kada fulan
DILI, 20 juñu 2024 (TATOLI)–Sekretáriu Jeral Cruz Vermelha Timor-Leste (CVTL), Luís Pedro Pinto, hateten CVTL mobiliza ema 50 halo doasaun raan ba iha Banco de Sangue iha Hospitál Nasionál Guido Valadares (HNGV) kada fulan.
CVTL halo nota entendimentu ho parseiru internasionál, setór privadu, Governu, instituisaun relijioza no universidade sira hodi bele kontribui asaun solidariedade hodi oferese raan ba ema seluk.
Responsável ne’e hateten, iha moras barak hanesan dengue, asidente, operasaun no anemia ne’ebé presiza raan loro-loron, entaun CVTL iha kompromisu servisu ho Banco de Sangue hodi bele mobiliza raan.
“Programa mobilizasaun raan ne’e agora ami kontinua. Atividade mobilizasaun raan ne’e iha munisipiu Dili de’it. Atividade mobilizasaun doasaun raan ne’e pelumenus fulan ida dala haat. Ema-ne’ebé fornese dalaruma ema to’o 50 no iha mobilizasaun balun liu no menus husi ida-ne’e,” Sekretáriu Jeral Cruz Vermelha Timor-Leste (CVTL), Luís Pedro Pinto, hateten ba Agência Tatoli, iha Colmera.
Uluk ne’e, nia hateten, uluk CVTL hetan fundus hosi parseiru Austrália no sira seluk maibé dadaun ne’e laiha ona no Gabinete sosiedade sivil mak fó apoiu ba sira rihun $140.
CVTL hanesan auxiliár no hetan rekoñesimentu husi Governu, tanba ne’e mak se bele, mensiona ka aloka verba ruma iha orsamentu jerál Estadu.
Nia sujere ba iha Ministériu Saúde atu bele aloka orsamentu rihun $100 ka rihun $50 kada tinan, hodi bele halo atividade mobilizasaun doasaun raan no fornese hahan ba sira-ne’ebé oferese raan ba iha Banco de Sangue.
“Ami kontinua programa mobilizasaun ne’e to’o iha dezembru liuliu ba programa mobilizasaun doasaun raan, bee mos, jestaun dezastre, primeiru sokorru, juventude,” nia dehan.
Ema seidauk iha koñesimentu di’ak kona-ba doasaun raan
Doasaun raan ba Banco de sangue ne’e importante, maibé ema barak seidauk iha koñesimentu di’ak, entaun CVTL presiza reforsa atividade sensibilizasaun “Ema seidauk iha koñesimentu, ida ne’e mak sei menus los no seidauk iha boa-vontade atu fó sira-nia raan vuluntariamente”.
“Ita lahatene, ita-nia raan ne’e ba sé maibé ita-nia raan ajuda salva ema seluk nia moris. Ida-ne’e mak ema ladún preokupa. Ema balun moris tanba nia raan ne’e. Ami-nia programa, ekipa kontinua halo sensibilizasaun no edukasaun hodi mobiliza doasaun raan,” nia hateten.
Tuir nia, raan sira-ne’ebé kolleta hosi mobilizasaun CVTL ne’e bele ajuda fali mós doadór sira-nia familia. Nune’e, husu ba ema hotu atu halo doasaun raan voluntariamente hodi bele ajuda ka salva ema seluk nia vida iha ospitál.
“Ba populasaun tomak, na’in-ulun sira, organizasaun hotu-hotu atu ajuda oferese raan voluntariamente ajuda ema seluk. Ajuda ema la presiza haree ho matan, maibé liuhosi raan ajuda ema seluk iha valór boot-liu duké fó iha oin. Raan turuk ida ajuda ema, mai kaer liman hamutuk no servisu hamutuk ajuda ema seluk,” nia apela.
Jornalista : Jesuína Xavier
Editór : Cancio Ximenes
