Eskola EBC 30 Agostu realiza ezame períodu daruak ho maneira hakerek iha kuadru
DILI, 21 juñu 2024 (TATOLI)–Diretór Eskola Ensinu Báziku Sentrál (EBC, sigla portugés) 30 Agostu, Vitorino Varia, hatete, ezame ba trimestre daruak diferente ho dahuluk nian tanba pontu ezame hakerek de’it iha kuadru.
“Ami iha ona planu katak ami sei utiliza tipu rua, ida mak ezame ne’ebé ita prense iha surat-tahan ne’e no ida mak hakerek iha kuadru mak estudante sira hakerek tuir hodi prense, maibé ida hakerek iha kuadru ne’e sei iha limitasaun númeru tanba ita hakerek de’it, bele ami fó númeru lima lae númeru 10 tanba hakerek de’it entaun han tempu. Nune’e, ami sei realiza enkontru ho profesór sira hotu depois ami iha tiha desizaun koletiva mak ami realiza,” Diretór Eskola informa ba Agência Tatoli, iha ninia knaar fatin, Comoro.
Notísia relevante : ESG Palaban realiza ezame segundu períodu tuir sistema ezame nasionál
Tanba ne’e, Dirijente ne’e husu ba ME atu hasai ona CPB, nune’e sira bele ba foti osan hodi bele netraliza situasaun ne’ebé mak sira enfrenta iha baze.
“Ami ba haree ami-nia konta bankária osan tama ona, maibé ami seidauk bele foti tanba CPB ne’e iha mak ami bele foti, maibé to’o agora seidauk iha. Ida-ne’e sai difikuldade atu realiza ezame, osan iha ne’ebé mak atu uza ba fotokopia imprensaun pontu ezame nian, ami tenke ba deve tan ne’e labele hotu nune’e ami labele halo buat ida, tanba empréstimu ida iha primeiru períodu nia ne’e seidauk selu,” nia akresenta.
Aleinde ne’e, eskola ne’e presiza tan profesór tamba profesór ne’ebé uluk kontratu ramata ne’e to’o agora nia matéria husik de’it.
“Ami presiza profesór na’in hitu tan, tanba foin lalais profesór kontratadu na’in-lima no voluntáriu na’in-rua ne’ebé mak nia kontratu ramata ona, entaun nia matéria husik de’it. Kuandu profesor laiha ne’e labarik sira mak vítima, ho nune’e ha’u fó ona mensajen ba diretór rekursu umanu I no ha’u rasik mak ba halo karta ba Ministériu Edukasaun atu koloka ema na’in-hitu ne’e ho urjénsia, maibé finalidade ita la hetan,” Diretór Eskola tenik.
Matéria ne’ebé to’o agora profesór laiha atu hanorin mak lian portugés, matemátika, tétun, desportu, inklui istória no jeografia.
“Agora tanba saida mak Ministériu Edukasaun la koloka profesór mai ne’e ita la hatene. Agora sira dehan bazeia ba inspensaun sira mai foti dadus profesór sira iha ne’e hamutuk ema na’in-58. Sira-nia estimasaun ne’e dehan profesór kompletu ona. Ami iha ne’e sala 36, kada turma ne’ebé ami estimaprofesór la to’o, maibé ami-nia na’i-ulun sira dehan to’o, maibe realidade mak profesór la tama estudante abandona iha li’ur de’it. Desde profesór na’in-hitu ne’e para hanorin, labarik sira abandona de’it no ita duni labarik sira mós sira dehan profesór mak la tama,” nia haktuir.
ME mak la koloka profesór, tanba ne’e ba iha períodu daruak sei nafatin iha problema ba estudante sira hanesan ho períodu ne’ebé liu ona.
“Períodu daruak ne’e sei nafatin hanesan ho problema períodu dahuluk tanba profesór mak laiha duni, ba ida-ne’ebé la’ós ita-nia área ne’e ita halo de’it avaliasaun ba estudante sira,” Vitorino Varia fó sai.
Estudante Eskola EBC 30 Agostu hamutuk 2.062, kompostu husi feto 1.013 no mane 1.048, ho profesór permanente hamutuk 58.
Jornalista : Osória Marques
Editora : Julia Chatarina
