iklan

DESPORTU, HEADLINE

FIEL FC hadau pontu tolu husi Iraler FC ho golu mihis

FIEL FC hadau pontu tolu husi Iraler FC ho golu mihis

Jogu Futebol Kopa FFTL 2024, FC Iraler kontra Fiel FC, iha estadiun Munisípal Dili, sesta (21/06). Imajen Tatoli/Francisco Sony

DILI, 21 juñu 2024 (TATOLI) – Ho jogu ne’ebé bonitu, FIEL FC susesu hadau pontu tolu husi adversariu Iraler FC ho golu mihis 1-0, iha jogu faze grupu kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, sesta loraik ne’e.

Tuir kultura futeból nian bainhira jogu la’e iha kampo laran ekipa rua lansa kedan kontra no atake ba malu tuir tékniku no abilidade ekipa idaidak nian oinsa bele hatama golu.

FIEL ho ambisaun hakarak manán jogu ne’e hodi lansa atake ne’ebé maka’as hasoru Iraler. Maibé Iraler mós la nonok utiliza meiu hotu oinsa hamate jogu ne’ebé FIEL halo.

Jogu Futebol Kopa FFTL 2024, FC Iraler kontra FIEL FC, iha estadiun Munisípal Dili, sesta (21/06). Imajen Tatoli/Francisco Sony

Oportunidade barak mak FIEL hetan maibé labele ezekuta ho di’ak tanba Iraler sempre hamate tutuir jogu ne’ebé FIEL halo. Iraler mós hetan oportunidade maibé susar iha finalidade ikus la prodús golu.

Ho forsa jogu ne’ebé hanesan to’o minutu jogu primeira parte termina laiha ekipa ida prodús golu, nune’e rezultadu provijoriu hela ho 0-0.

Dolar ba segunda parte ekipa rua mantein iha ritmu jogu ne’ebé iha hodi lansa kontra no atake ba malu, maibé seidauk bele hatama golu no rezultadu nafatin hela ho 0-0.

FIEL hanesan ekipa Liga Futeból Timor-Leste (LFTL) segunda divizaun, lakoi hamonu nia dignidade ho klube istimadu husi Munisipiu Viqueque nia kontinua esforsu ho meiu hotu oinsa prodús golu.

Esforsu ne’ebé FIEL halo la hela de’it hanesan esforsu tanba jogu la’o to’o minutu 78 jogadór Domingos Maia (15) konsege fura duni baliza Iraler hodi hatur rezultadu ba 1-0.

Golu ne’e halo Iraler sente la hakmatek, tenke serbisu maka’as ho kapasidade jogu ne’ebé iha, maibé esforsu hotu hela de’it hanesan esforsu tanba laiha oportunidade atu halo empata jogu ne’e.

Ikus to’o jogu termina laiha tan ekipa ida mak prodús golu, nune’e vitoria hela ba FIEL maske manán ho golu mihis, maibé manán no Iraler hela ho derrota.

Husi rezultadu ne’ebé FIEL rekolla lori kedan ekipa ne’e lidera grupu C ho pontu lima, iha pozisaun segundu Zhavia FC ho pontu haat, pozisaun terseiru Iraler FC ho pontu tolu no ikus liu Maubale FC ho pontu ida.

Notísia relevante: Ezaquiel da Cruz lori Marca manán mihis FIEL 1-0

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!