DILI, 21 juñu 2024 (TATOLI)–Vise-Primeiru-Ministru, Ministru Koordenadór Asuntu Sosial no Ministru Asuntu Dezenvolvimentu Rural no Abitasaun Komunitária, Mariano Assanami Sabino, halo lansamentu ba programa “Kolokasaun Funsionáriu ba Aldeia” hanesan ajente transformasaun hafoun aldeia.
Nia hateten, lansamentu kolokasaun funsionáriu iha etapa primeiru ho funsionáriu hamutuk 58 no etapa daruak hamutuk 82 [totál 140] ne’e sei koloka ba aldeia 70 iha munisipiu ualu (8) ba programa revitalizasaun mak hanesan mmunisípiu Ainaro, Baucau, Bobonaro, Covalima, Lautém, Liquiça, Manatuto no Manufahi.
“Funsionáriu sira-ne’e hetan ona formasaun ka formadu ona no hahú agora ita lansa para ba aldeia. Ita hahú hosi aldeia, tanba aldeia nafatin sai fatin ki’ak no mánutrisaun aas barak no kampu servisu laiha no produtividade laiha,” Vise-Primeiru-Ministru, Ministru Kordenadór Asuntu Sosial no Ministru Asuntu Dezenvolvimentu Rural no Abitasaun Komunitaria, Mariano Asanami Sabino, hateten iha nia diskursu iha serimónia lansamentu kolokasaun funsionáriu sira iha Caicoli.
Assanami reforsa, funsionáriu sira-ne’e atu ba servisu hamutuk ho xefe aldeia no xefe suku sira no funsionáriu sira seluk iha ne’ebá, maibé alvu servisu ba sira mak mánutrisaun, ki’ak no oinsá kria servisu ba área produtividade bele la’o.
Vise Xefe Ezekutivu ne’e hateten, funsionáriu sira hetan servisu kontratu fulan neen maibé iha posibilidade kontinua kontratu.
Iha fatin hanesan, Diretór Jerál ba diresaun Dezenvolvimentu Rural no Asaun Komunitaria, Filipe Cardoso Vieira, hateten funsionáriu sira-ne’e sei koloka diretamente ba área rurál hodi apoiu ministériu nia programa ne’ebé destinadu ba aldeia alvu aprova iha tinan ida-ne’e.
“Programa sira-ne’e define iha asaun anuál iha Orsamentu Jeral Estadu 2024 ho montante millaun $3.5 ba ministériu mak programa revitalizasaun komunitária. Programa diretamente ba aldeia hodi promove potensialidade ne’ebé eziste,” nia dehan.
Diretór ne’e hateten, Governu halo diagnostiku katak iha aldeia sira-ne’e iha poténsia iha kada aldeia, tanba ne’e aloka funsionáriu sira-ne’e hodi bele dezenvolve aldeia sira-ne’e.
“Potensialidade ne’e hanesan peska, agrikultura no ortikultura no pekuária. Entaun, funsionáriu sira oinsá atu promove no dezenvolve, ne’ebé bele fó empregu no rendimentu ba komunidade iha area rural,” nia hateten.
Jornalista : Jesuína Xavier
Editór : Cancio Ximenes
