iklan

NASIONÁL, EKONOMIA, INTERNASIONÁL, DILI, HEADLINE

Governu-Woodside kontinua diskute dezenvolvimentu kampu Greater Sunrise

Governu-Woodside kontinua diskute dezenvolvimentu kampu Greater Sunrise

Imajen/Espesial

DILI, 21 juñu 2024 (TATOLI) – Ministru Prezidénsia Konsellu Ministrus no Interlokutór iha diskusaun kona-ba Greater Sunrise, Agio Pereira, hala’o sorumutu ho Vise-Prezidente Woodside Energy, Andy Drummond, liuhusi video konferénsia, hodi diskute pontu situasaun no dezenvolvimentu ba kampu Greater Sunrise.

Reuniaun ne’e konta ho partisipasaun husi reprezentante parseiru Joint Venture nian sira, hanesan António Dos Santos, Diretór Nasionál Woodside iha Timor-Leste, David Reid, Diretór-Jerál ba Avaliasaun no Dezenvolvimentu APAC no Prezidente Komité ba Sunrise Joint Venture, Rui Soares, Prezidente no CEO hosi Timor GAP, Otsuka Yo, Diretór Ezekutivu ba Osaka Gas Austrália, Rod Lake, Diretór Komersiál ba Osaka Gas Austrália  no Ika Moniz, Asesora Prinsipál no Asesora Polítika no Relasaun Públika ba Gabinete Ministru Prezidénsia Konsellu Ministrus.

“Reuniaun ne’e atualiza informasaun kona-ba progresu Sunrise Joint Venture no aprezenta vizaun jerál ida kona-ba estudu konsetuál Sunrise nian, ne’ebé hahú ona iha fulan-abril liubá,” tenik iha nota ne’ebé Agência TATOLI asesu iha media Konsellu Ministru, ohin.

Iha reuniu ne’e, Ministru Agio Pereira ko’alia kona-ba ninia kna’ar nu’udar interlokutór iha diskusaun kona-ba Greater Sunrise no salienta katak ida-ne’e maka projetu ne’ebé importante liuba Timor-Leste.

Prioridade Governu nian maka progresu iha dezenvolvimentu Greater Sunrise hodi masimiza kriasaun kampu servisu iha nasaun ne’e, tuir Programa Governu ida ne’e nian.

Ministru ne’e hateten mós katak, iha tempu badak, atu konkretiza vizaun ida-ne’e, Governu sei nafatin envolve iha negosiasaun ho empreza sira ne’ebé envolve iha prosesu Greater Sunrise, hanesan prevee ona iha Tratadu Fronteira Marítima entre Timor-Leste ho Austrália, hodi implementa rejime espesiál ba kampus Greater Sunrise liuhosi kadoras ba Timor-Leste.

Reuniaun ho Woodside Energy no parseiru sira seluk joint venture nian ida-ne’e reflete abordajen foun ida, ne’ebé marka ho mentalidade ida ne’ebé nakloke no konstrutiva liu iha diskusaun kona-ba Greater Sunrise.

Partisipante sira hotu konkorda hodi hala’o reuniaun barak liután iha futuru, ho objetivu atu reforsa kapasidade hosi parte hotu-hotu atu hamutuk hetan solusaun reál no substansiál ba dezenvolvimentu Greater Sunrise nian.

Progesu dezenvolvimentu Greater Sunrise

Molok ne’e, Primeiru-Ministru, Kay Rala Xanana Gusmão, no Diretora Ezekutiva Empreza Petrolífera Woodside, Meg O’Neill, realiza reuniaun ida, iha loron 6 fulan-marsu tinan 2024, iha Melbourne, Austrália, hodi diskute kestaun sira relasiona ho prosesu dezenvolvimentu ba projetu estratéjiku kampu petrolíferu Greater Sunrise nian.

Durante enkontru ne’e, Primeiru-Ministru no Diretora Ezekutiva Woodside, deskute kona-ba estudus viabilidade relasiona ho dezenvolvimentu Greater Sunrise, nune’e mós prosesu negosiasaun ho Austrália kona-ba konseitu dezenvolvimentu rekursus nian.

Xefe Governu ne’e reafirma pozisaun Timor-Leste nian hodi estabelese baze abastesimentu no refinaria ida iha Tasi Mane, hodi liga ba kadoras Greater Sunrise, ho objetivu atu dezenvolve indústria petrolífera nasionál ida, atu garante benefísiu justu ba Timor-Leste iha esplorasaun rekursus minerais.

Xanana Gusmão destaka katak, daudaun ne’e konklui ona luta Timor-Leste nian ba delimitasaun permanente fronteiras marítimas ho Austrália, Ministru Petróleu no Rekursus Minerais, Francisco da Costa Monteiro, no ninia ekipa oras ne’e serbisu maka’as hodi koordena ho Woodside no parte sira seluk ne’ebé envolve atu avansa iha prosesu ida-ne’e.

Meg O’Neill hato’o ninia agradesimentu ba Governu Timor-Leste ne’ebé nafatin fó konfiansa hodi serbisu hamutuk ba dezenvolvimentu Greater Sunrise.

Woodside, empreza australiana iha setór enerjia, hanesan parte hosi konsórsiu ne’ebé dezenvolve kampu Greater Sunrise (Sunrise Joint Venture) ho partisipasaun 33,44%, hamutuk ho TIMOR GAP ne’ebé iha 56,6%, no Osaka Gas Australia ho partisipasaun 10%.

Kampu gás naturál no kondensadu Sunrise no Troubadour, ne’ebé hamutuk hanaran kampu Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha norueste Darwin, iha Territóriu Norte Austrália nian.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!