DILI, 21 Juñu 2024 (TATOLI)- Koordenadór Komisaun Ezekutiva Zona Ekonomia Espesiál Dezenvolvimentu Oe-Cusse Ambeno (KE-ZEEDOA), João Mendes Gonçalves, atualiza bá Primeiru-Ministru (PM), Kay Rala Xanana Gusmão, kona-bá preparasaun relatóriu Estadu dezenvolvimentu iha Rejiaun Administrativa Espesiál Oecusse Ambeno (RAEAO).
“Servisu ne’ebé KE-ZEEDOA hala’o mak preparasaun relatóriu Estadu rejiaun ne’ebé finaliza ona no avansa ba konsultasaun públiku”, João Gonçalves hateten.
Tuir planu, iha konsultasaun públika ne’e sei konvida instituisaun sira iha RAEOA, parseiru dezenvolvimentu, seitór privadu, sosiedade sivíl no veteranu sira hodi hetan sujestaun ruma atu ikus-liu bele finaliza hodi avansa bá Planu Estratéjiku Dezenvolvimentu Oe-cusse Ambeno to’o tinan 2030.
Durante audiénsia ho Primeiru-Ministru, hato’o mós informasaun kona-bá progresu servisu ne’ebé Komisaun Ezekutiva hala’o dadaun iha Oe-cusse inklui hato’o relatóriu kona-bá vizita bá iha Batak Indonézia foin lalais ne’e.
Atualiza mós kona-bá situasaun atuál, daudaun ne’e KE-ZEEDOA utiliza hela orsamentu RAEOA nian ne’ebé limitadu tebes, tanba laiha fundu sufisiente atu kontempla ida-ne’e.
Primeiru-Ministru orienta ona atu KE-ZEEDOA submete asuntu ne’e bá Ministériu Finansas (MF) hodi haree hamutuk, nune’e bele buka solusaun.
Kona-bá estudu bá estabelesimentu Zona Ekonómika Espesiál Oé-cusse Ambeno ne’ebé KE-ZEEDOA halo, iha progresu di’ak no aselera hela atu bele finaliza iha fulan Setembru, nune’e aprezenta relatóriu bá Primeiru-Ministru hodi lori bá Konsellu Ministru.
Preparasaun planu ne’e involve mós projesaun orsamentál tinan-lima nian no KE-ZEEDOA define kedan planu anuál tuir prioridade ho nia orsamentu kada tinan.
Atualizasaun ikus maka sei prepara enkuadramentu legál ne’ebé sei harii entidade jurídika, lideradu hosi KE-ZEEDOA ho nia kompeténsia rasik.
Jornalista: Hortencio Sanchez
Editór : Florencio Miranda Ximenes
