Komandu F-FDTL prepara membru 88 tuir misaun pás ONU
DILI, 21 juñu 2024 (TATOLI) – Komandu FALINTIL-Forsa Defeza Timor-Leste (F-FDTL), hahú prepara membru hamutuk 88 atu ba tuir misaun pás ONU nian.
Membru F-FDTL 88 molok tuir ezersísiu ho naran UN Asu Wain 1, iha fulan kotuk no ezersísiu ne’e foku liu ba servisu misaun pás no ezersísiu ida-ne’e termina ona iha sesta (21/6), ohin.
Komandante Forsa Apoiu Jerál F-FDTL, Koronél Celestino Pinto “Daleba”, hateten ezersísiu ida -ne’e durante semana lima, hosi Forsa Terrestre, Forsa apoiu jerál ne’ebé hamutuk ho forsa Austrália sira hodi halo treinamentu no prepara aan durante semana lima, hodi hasae sira-nia kapasidade, treinu individuál, koletivu oinsá responde ba missaun ONU nian.
“Ita-nia militár sira ne’e, ita prepara atu ba kumpre misaun ida, maibé ita seidauk hatete katak iha data ou fulan hanesan ne’e mak ita atu partispa iha misaun ONU nian ne’e, maibé ita hein ordem husi ita-nia ierarkia sira kuandu sira determina katak ita ba, ne’e ita ba ona”, Koronél Celestino iha nia diskursu hafoin ensera Ezersísiu UN Asu Wain 1 iha Sentru Instrusaun Komandante Nicolau Lobato, Metinaru, sesta, ohin.
Nia husu ba membru F-FDTL 88 ne’ebé partisipa iha ezersísiu durante semana lima atu kontinua hatudu kapasidade ne’ebé iha atu komandu hatún ba tuir misaun pás iha ONU, entaun ba de’it ona.
“Imi idaidak fila ba komponente no unidade, atu kontinua halo ezersísiu ba matéria sira ne’ebé parseiru Austrália no instrutór sira no timoroan sira atu imi kontinua momoriza nafatin”, nia adianta.
Nia husu ba membru F-FDTL 88 atu prepara aan nafatin bainhira ba partisipa misaun pás ONU nian iha nasaun ne’eb’e de’it.
“Imi tenke hatudu nafatin disipliña, kumpre nafatin ba regra sira husi unidade no komponente”, nia konklui.
Jornalista: Natalino Costa
Editór : Zezito Silva
