iklan

MUNISÍPIU, VIQUEQUE

Reabilita estrada no ponte, MOP foti ona amostra ba rai no rai henek iha Viqueque

Reabilita estrada no ponte, MOP foti ona amostra ba rai no rai henek iha Viqueque

Ponte Sumaku aat kuaze fulan ida ona, maibé MOP seidauk halo manutensaun hodi difikulta movimentu tema no transporte. Imajén Tatoli/Vitorino Lopes da Costa

VIQUEQUE, 21 juñu 2024 (TATOLI)- Diretór Servisu Obra Públika (SOP) munisípiu Viqueque, Casildo Gomes Soares, informa, daudaun foti ona amostra hanesan rai no rai-henek hodi halo teste iha laboratóriu, hodi bele uza ba halo reabilitasaun ba estrada no ponte sira ne’ebé aat iha munisípiu Viqueque,

“Kona-ba prosesu manutensaun ba estrada sira-ne’ebé kondisaun aat ne’e, daudaun ami foti ona amostra atu ba teste rai ho rai henek hodi hatene nia kualidade sira hafoin empreza responsavél bele utiliza ba halo manutesaun ba estrada no ponte sira ne’ebé aat iha munisípiu Viqueque ne’e”, Casildo Gomes Soares, hateten ba Agência TATOLI, iha ninia kna’ar fatin, Beloi, ohin.

Manutesaun estrada a’at sira iha Viqueque MOP hahú prosesu teste materiál rai no rai henek.Imajén Tatoli/Vitorino Lopes da Costa

Nia afirma rezultadu teste laboratóriu nasionál sai mak orienta empreza sira atu utuliza hodi taka estrada kuak sira husi diresaun Viqueque Vila to’o suku Uma Uain-Leten, no postu Viqueque Vila to’o suku Luca.

Molok ne’e, empreza utiliza rai mutin mak taka estrada ku’ak, maibé ekipa nasionál haree rai ne’ebé empreza uza labele, nune’e mak halo fali teste ba rai no rai henek, karik ida-ne’e di’ak hafoin uza.

Reabilitasaun ba estrada sira-ne’ebé ku’ak no kotu iha munisípiu Viqueuqeu ne’e responsabiliza husi empreza Jamatil unip LDA, tanba hetan kontratu iha mandatu Oitavu Governu to’o agora kontratu seidauk hotu.

Manutesaun ba estrada ku’ak sira iha munisípiu Viqueque laran ho totál orsamentu rihun $800, estrada sira-ne’ebé halo manutensaun husi Viqueque Vila ba postu Uatulari ho totál kilometru 26, Uatulari liga postu Uatucarbau kilometru 30 no postu Viqueque Vila to’o suku Luca kilometru 13-resin.

 Hadi’a lalais ponte Sumaku

Entretantu, Xefe suku Dilór, Postu Lacluta, Jacinto Ximenes, kontinua ejize ba ba Governu liuhusi MOP atu hadi’a lalais ponte Sumaku ne’ebé kotu tanba difikulta movimentu ema no trasporte públiku.

“Ponte ne’e kotuk kuaze fulan rua resin ona, maibé seidauk halo manutensaun. Difikuldade ne’ebé ami povu loro-loron enfrenta maka hanesan tempu udan mota tun labele liu tenke hein iha mota sorin, moras ruma urjente ba Viqueque mós susar. Tan ne’e maka ami sujere ba Governu hadi’a lalais hodi fasilita movimentu ema no transporte públiku sira liuliu tempu udan”, Xefe suku Dilór, Jacinto Ximenes, hateten ba Agência Tatoli, postu Viqueque Vila, ohin.

Hataan ba preokupasaun ne’e  Diretór Servisu Obra Públika (SOP) munisípiu Viqueque, informa Governu kontratu ona empreza ida hodi hadi’a estrada hamutuk kilométru 12 ne’ebé liga husi baliza suku Luca to’o postu Lacluta Vila, maibé  daudaun iha prosesu nian laran.

“Kona-ba preokupasaun ponte Sumaku ne’e Governu hetan empreza ida, maibé empreza ida-ne’ebé mak sei halo ha’u seidauk hatene loloos. Maibé, ha’u rona iha tempu badak nian laran ne’e empreza sei mai halo lansamentu ba estrada kilométru 12 husi baliza suku Luca to’o iha postu no sei rezolve mós ponte Sumaku, ne’ebé ita pasiénsia hein prosesu”, nia sujere.

Enkuantu, Ponte Sumaku lokaliza iha suku Uma Tolu ne’ebé kotu iha loron 6 Abríl 2024 tanba  impaktu husi udan boot, nune’e  difikulta abitante postu Lacluta  kompostu husi suku haat hanesan Uma Tolu, Dilór, Ahic no Laline, ho totál abitante 8.123 husi uma-kain 1.907.

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!