VIQUEQUE, 22 juñu 2024 (TATOLI) – Koordenadór Bee Timor Leste, Empreza Públika (BTL,E.P) Munisípiu Viqueque, Marito da Costa, informa BTL, E.P nasionál destaka ona tékniku operadór hamutuk na’in-lima hodi apoia ba BTL,E.P Munisípiu Viqueque.
“Ami foin lalais loron 10 fulan-Juñu ne’e nasionál destaka ona funsionáriu tékniku operadór ema na’in-lima ne’ebé aprezenta aan ona no agora sira hahú servisu, haree kanu distribuisaun no metro kontadór sira iha kapitál Viqueque”, Marito da Costa, hateten ba Agência Tatoli, iha ninia knaar fatin, Beloi, ohin.
Nia rekorda, antes ne’e tékniku operadór BTL,E.P Viqueque hamutuk na’in-sia, maibé tékniku operadór na’in-lima maka sai tiha. Entaun tékniku operadór hela ema na’in-haat, ne’ebé difikulta tebes ba servisu atendimentu ba kliente sira no kontrola kanu transmisaun sira.
Marito akresenta, apoia tékniku operadór na’in-lima ne’e reforsa tékniku operadór na’in-4 hodi kontrolu kanu distribuisaun sira iha kapitál.
Tékniku operadór sira-ne’e atu tau matan no melloramentu sistema bee-moos iha sidade Viqueque Vila hodi hadi’ak ba kanu transmisaun, kanu distribuisaun, kanu ligasaun ba uma no monta metru kontadór ba zona Beloi sei haree mós metru kontadór BTL,E.P Viqueque hahú husi 2021, 2022, 2023 to’o 2024 agora instala ona unidade 394.
“Husi tékniku na’in-lima ne’e na’in-ida ha’u destaka fali iha Postu Ossu hodi kontrola projetu sistama bee-moos ne’ebá. Na’in-haat agora kontinua apoia iha Viqueque”, nia realsa.
Kona-ba rekursu, nia dehan, ba oin sei kompleta mós apoiu klinte, letor metru kontadór, atu nune’e BTL,E.P Viqueque tau ona ba planu orsamentu tinan 2025 nian.
“Tuir ami-nia planu ne’e lee metro kontadór ema na’in-rua no apoiu kliente na’in-rua hodi apoiu servisu sistema bee-moos iha Munisípiu Viqueque. Ami-nia esperasan ne’e kompleta rekursu iha tinan oin, maibé depende ba orsamentu pasa, maske ami tau ona ba planu perioridade”, nia hato’o.
Funsionáriu BTL,E.P Viqueque, atualmente hamutuk na’in-15, kompostu husi tékniku operadór no administrasaun hodi fó atendimentu ba abitante sira.
Jornalista : Vitorino Lopes da Costa
Editór : Zezito da Silva
