VIQUEQUE, 22 juñu 2024 (TATOLI) – Koordenadór Bee Timor Leste, Empreza Públika (BTL,E.P) Munisípiu Viqueque, Marito da Costa, informa progresu hosi obra fízika ba konstrusaun sistema bee-moos ba abitante Postu Lacluta, Munisípiu Viqueque atinje ona 58%.
“Progresu sistema bee-moos ba Postu Lacluta daudaun ne’e ita-nia empreza implementadór atinje ba 58%. Husi atinjimentu ne’e empreza konsege kanu distribuisaun Lacluta vila, monta hotu ona, tanke rua halo hotu ona, tanke anin no tanke intek husi bee matan maka seidauk, maibé tanke rua ne’e servisu lais”, Marito da Costa, hateten ba Agência Tatoli, iha Postu Viqueque Vila, ohin.
Nia dehan, empreza kontinua distribui kanu distribuisaun husi bee matan hamutuk 500 maka tula ona bá fatin implementasaun projetu iha Lacluta.
“Ba servisu ne’e, empreza tau tán tiha tanke intek iha bee-matan hotu no monta tán kanu transmisaun husi bee matan hotu, iha fulan ida-ne’e ramata, sira bele atinje ba 75 %-resin. Nune’e mós agora ba pagamentu 25% halo ona no daudaun ne’e prepara ba pagamentu 50%”, nia relata.
Nia hatutan, servisu sira-ne’e hotu empreza sei kontinua instala bee ba uma-ka’in sira hodi monta mós metru kontadór ba benefísiáriu sira.
“Projetu sistema bee-moos ba Postu Lacluta, ami observa servisu lala’is fali ona. Tanba ha’u nia tarjetu tama iha fulan-Setembru ne’e projetu referidu bele finaliza”, nia hato’o.
Empreza Timor Rindo Unip, Lda, Jorge Henrique, dehan empreza esforsu hodi aselera projetu dada bee-moos ba abitante Postu Administrativu Lacluta, Munisípiu Viqueque ne’ebé abandona kuaze tinan ida.
“Ami agora ativu servisu no segunda, ami hahú monta kanu distribuisaun husi bee-matan nian tanba horseik kanu distribuisaun nian to’o ona iha Lacluta. Kona-ba tanke sira ne’e, rua ami halo hotu ona, hela tanke intek no anin, ami-nia materiál preparadu iha terenu”, nia salienta.
Kona-ba instalasaun bee ba uma-kain sira, nia dehan, emepreza agora dadaun hahú prodús kontadór iha Dili, depois hotu mak semana oin distribui ona ba Lacluta hodi instala ba uma.
Projetu melloramentu sistema bee-moos ba Postu Administrativu Lacluta husi foho Bibileo huun ho distánsia kilométru 4,5 ho kustu $582.100. Projetu referidu fó benefísia ba abitante Lacluta ne’ebé hela iha Postu Lacluta Vila, área Suku Dilór ho totál populasaun 4.158 ka Uma-Kain 693.
Jornalista : Vitorino Lopes da Costa
Editór : Zezito da Silva
