ME fó pose ba profesór permanente na’in-275 iha Viqueque

VIQUEQUE, 24 juñu 2024 (TATOLI)-Ministériu Edukasaun (ME), liuhusi Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál hamutuk ho Prezidente Funsaun Públika (PFP), segunda ne’e, fó pose  ba profesór kontratadu ba ingresu espesiál no rejime kareira dosente na’in-265  iha munisípiu Viqueque.

Biban ne’e, Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, hateten, profesór sira-ne’e kuaze tinan barak voluntáriu liuliu balun hahú husi tinan 2011 mai karik no hetan kontratu iha tinan 2013, nune’e iha mandatu  Governu da-sia kontrata profesór sira-ne’e ba ingresu espesiál no rejime kareira dosente.

“Tanba durante ne’e profesór permanente sira fó matéria barak ba profesór kontratadu sira-ne’e hodi hanorin oras barak saladeaula laran. Ho nune’e  Governu deside fó ingresu espesiál no rejime kareira dosente B ba profesór hamutuk 275 maka asina turnu pose profesór permanente, ha’u husu ba profesór sira-ne’ebé halo juramentu ba Maromak no rai ida-ne’e tenke  servisu ho di’ak, profisionalizmu, sai hanesan ema edukadór”, Domingos Lopes Lemos, hateten iha sermónia pose ba profesór sira, iha resintu Servisu Edukasaun munisípiu Viqueque, ohin

Governante ne’e mós husu ba profesór hirak ne’e atu halo kooperasaun di’ak ho profesór sira seluk iha munisípiu Viqueque no halo komunikasaun ne’ebé di’ak ho komunidade sira  hodi hadi’a kualidade ensinu.

“Ha’u husu profesór sira kontinua halo transformasaun ida-ne’ebé di’ak liu, iha eskola sira-ne’ebé profesór hanorin bá.  Tanba profesór mak úniku solusaun hodi halo mudansa ba eskola sira”, nia fó hanoin.

Iha oportunidade ne’e,  Prezidente Autoridade Munisípiu Viqueque, Francisco C.S Gonzaga Soares, enkoraja profesór sira atu serbí estudante sira ho di’ak no sai edukadór ne’ebé bele muda estudante sira-nia mentalidade no muda pensamentu estudante sira-nia.

“Atu nune’e jerasaun munisípiu  Viqueque sai ema ka labarik ida ne’ebé  iha morál, etika hodi kontribui ba rai ida-ne’e”, nia enkoraja.

Entertantu, Diretór Servisu Edukasaun Munisípiu Viqueque, Júlio Sacadura, haktuir, profesór presiza hakruk ba lei inan no lei oan sira iha Timor -Leste hodi hala’o kna’ar iha eskola sira iha munisípiu Viqueque.

“Ha’u husu agradese ba ME ne’ebé fó ona pose ba profesór sira iha munisípiu Viqueque. Meiu ida ne’e hodi bele rezolve profesór ne’ebé menus hodi garante prosesu aprendizajen ne’ebé la’o di’ak”, nia afirma

Tuir dadús profesór ne’ebé simu pose ba permanente ho  totál  na’in-275 kompostu husi Ensinu Pré-Eskolár (EPE) na’in-52, Ensinu Báziku Sentrál (EBC, sigla Portugés) na’in-174, Ensinu Sekundáriu Gerál (ESG) na’in-39 no Ensinu Sekundáriu Tékniku Vokasionál (ESTV) na’in-10.

Inspetór tenke kontrola eskola sira

Entretantu, Prezidente Komisaun  Funsaun Públika (KFP), Agostinho Letêncio de Deus,  husu inspitór eskolár foun na’in-7 iha munisípiu Viqueque tenke servisu ho responsablidade hodi kontrola eskola sira.

“Ohin inspitór eskolár sesante sira halo ona hand over servisu  mandatu inspetór nian ne’ebé durante ne’e,  halo kontrolu ba eskola sira iha munisípiu Viqueque. Serbisu inspesaun la’ós serbisu ida-ne’ebé fasil, maibé serbisu ida-ne’ebé sai profesór sira la gosta tanba check bei-beik absénsia profesór sira-nia, simu inspitór sai hanesan servisu todan.  Tan ne’e,   ha’u husu ba inspitór eskolár foun na’in-7 ne’ebé simu ona knaar hanesan inspitór eskolár ne’e tenke ho responsablidade  hodi kontrolu eskola sira”, Agostinho Letêncio de Deus,  hateten iha serimónia hand overd servisu, iha resintu eduakasaun munisípiu Viqueque, ohin.

Husu mós inspetór eskolár sesante sira nafatin apoiu inspetór foun sira tanba ida-ne’e servisu foun  no emerjésia ne’ebé di’ak liután hodi kontrolu másimu ba eskola sira.

Reprezentante  Inspetór Eskolár sesante, Francisco Fernandes, haktuir, asume knaa’r inspetór eskolár durante mandatu tinan rua hodi hadi’a kualidade  edukasaun, maibé la’ós fasil tanba ne’e husu inspetór foun sira tenke servisu ho efikasia no efisiensia hodi orienta estudante no profesór sira ho lolos.

Biban ne’e, Inspetór Eskolár atuál, António Pinto, kompremete inspetór eskolár foun na’in-7 simu knaar la’ós sai obstaklu, maibé fó ho vontade hodi hala’o knaar ho lolos no kuidadu.

“Ami inspitór eskolár sira-nia prezensa iha eskola, atu reforsa direjente eskola, autoridade lokál, administradór postu lima hodi kombate profesór sira-ne’ebé tama tarde sai sedu sira. Ami sei hala’o servisu onestidade no responsablidade, ami sei kolabora ho inspetór sesante sira”. tenik nia.

Jornalista   : Vitorino Lopes da Costa

Editór       : Florêncio Miranda Ximenes