iklan

POLÍTIKA

Membru PN husu Governu kontrola xineza halo atividade negosiu to’o munisipiu

Membru PN husu Governu kontrola xineza halo atividade negosiu to’o munisipiu

Uma Fukun Parlamentu Nasionál. Imajen/Espesiál

DILI, 24 juñu 2024 (TATOLI)—Membru Parlamentu Nasionál (PN), liuhusi Deputadu bankada PD, Armando Lopes, preokupa no husu Governu atu kontrola xineza sira hala’o atividade negósiu to’o ba iha munisípiu balun hodi hamate negosiante timoroan sir-nia hakat.

“Ohin, ha’u hakarak hato’o situasaun negosiante timoroan rasik ne’ebé iha munisípiu no postu katak agora daudaun ameasadu atu taka sira-nia negósiu tanba negosiante estranjeiru balun infiltra tama ona iha negosiante timoroan iha munisípiu balun. Ameasa rua, hanesan aleinde sira faan materiál konstrusaun no hahú faan ona sasán nesesidade báziku ne’ebé negosiante timoroan rasik bele faan,” nia levanta liuhusi reuniaun plenária Parlamentu Nasionál, segunda ne’e.

Nia dehan, negosiante estranjeiru faan ho presu baratu entaun ema hotu halai ba sosa iha sira-nia sasán, nune’e automatikamente negosiante timoroan sira taka sira-nia negósiu tanba ema laiha ona ba sosa, ne’e estratéjia estranjeiru sira atu hamate ekonomia povu nian no hamate espíritu negosiante timoroan rasik.

Tanba ne’e, nia sujere Governu atu urjentemente halo intervensaun polítika no jurídika ba atividade negósiu kiik ne’ebé tuir loloos negosiante timoroan sira mak halo, Governu labele fasilita estranjeiru sira konsekuetemente iha osan monu hotu ba estranjeiru sira-nia liman hodi lori ba rai-li’ur, tuir loloos sira kuda iha Timor-Leste atu haburas ekonomia timoroan rasik iha munisípiu, postu no suku ho aldeia.

“Ba kada munisípiu ne’ebé estranjeiru hala’o negósiu ita bele permite maibé tenke determina aldeia ka sentru negósiu ba estranjeiru sira so permite sira bele faan materiál konstrusaun no nesesidade báziku bele faan grosu labele eceran,” nia sujere

Aleinde ne’e, intervensaun lalais atu garantia polítika Governu ne’ebé fó kapitál ka fundu kiik ba povu kiik sira atu hala’o negósiu, nune’e labele mate ho imperativu negosiante estranjeiru.

“Ho situasaun hirak ne’e, mak negosiante timoroan sira husi munisípiu, postu no aldeia hato’o mai nu’udar reprezentante povu iha uma fukun ida-ne’e. Nune’e, enkamina ba Governu Konstitusionál da-sia hodi kontrola, atu nune’e ita-nia ekonomia bele buras iha ita-nia povu negosiante sira iha sira-nia moris. Tanba, daudaun iha baze negosiante husi xineza atu domina ita-nia ekonomia povu nian hodi hamate tan ekonomia povu,” nia dehan.

Deputadu FRETILIN, Joaquim dos Santos, sekunda mós prezensa negosiante xineza to’o ba munisípiu, mezmu nune’e iha lei investimentu klaru ona katak ema estranjeiru atu mai investe ho kapitál boot iha rai-laran la’ós mai loké negósiu hanesan mós ho timoroan sira, nune’e husu Governu atu haree kestaun ne’e.

Liuhusi reuniaun plenária reprezentante Governu liuhusi Sekretária Estadu Igualidade (SEII), Elbina de Sousa, rejista preokupasaun Deputadu sira-nian sei envia ba ministériu tutela

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!