DILI, 25 juñu 2024 (TATOLI)–Xefe Departamentu Ekstrakurrikulár iha Universidade Nasionál Timor-Lorosa’e (UNTL), Joviano Saves, hateten, atleta 32 daudaun ne’e halo preparasaun hodi partisipa iha Asean University Games (AUG) ba dala-21, ne’ebé sei realiza iha Surabaya no Malang (Indonézia), hahú loron 25 juñu to’o 06 jullu 2024.
“Totál atleta ne’ebé selesionadu ba tuir eventu Asean University Games hamutuk 32, kompostu husi Institutu Ensinu Superiór sira hotu iha Timor-Leste, ne’ebé ita halo ona selesaun iha fulan-rua ba kotuk, ho modalidade lima hanesan taekwondo, volley ball, futsal, xadres, no atletizmu,” Joviano informa ba Agência Tatoli, via telefónika, tersa ne’e.
Modalidade xadres no futsal arranka ona desde loron 23 juñu, ne’ebé ohin halo hela technical meeting no aban hahú kompetisaun.
Enkuantu modalidade taekwondo, volley ball no atletizmu mak sei sai husi Dili iha loron 29 juñu via terrestere no iha loron 30 kontinua ba arranka husi Kupang bá Surabaya.
“Iha tinan ne’e, ba dahuluk Timor-Leste nia partisipasaun iha Asean Sea Games, federasaun akadémika 2014, ida-ne’e ba dala-haat ka dala-lima ona. Tanba ne’e ita espera katak sira bele hatudu rezultadu di’ak, antes ne’e iha tinan 2014 sira partisipa iha Palembang, sira kontribui medalla osan-metan, depois iha Singapura 2016 ho modalidade futeból no atletizmu konsege oferese medalla osan-mutin,” nia akresenta.
Iha tinan 2018, iha Myanmar konsege oferese osan-mean rua no iha Tailándia mós konsege liuhusi modalidade taekwondo no atletizmu konsege medalla osan-metan no mutin.
Prezidente interinu Federasaun Desportu Akadémiku Timor-Leste (FDA-TL), Ricardo da Costa Ribeiro, hateten, kompetisaun rejionál AUG tinan ne’e sei realiza iha Surabaya no Malang, ne’ebé atleta universitáriu husi nasaun 11 iha rejiaun sudeste aziátiku sei kompete ba modalidade 23 hodi hadau medalla hamutuk 250, nune’e Timor-Leste nia atleta mós hola parte.
“Sira arranka iha loron 23 juñu, ne’ebé atleta hamutuk ho treinador inklui ofisiál sira ema na’in-48 mak bá, ha’u iha esperansa boot tebes ba sira tanba sira hirak ne’e selesionadu husi universidade hotu no sira hirak ne’e mesak atleta nasionál. Tanba ne’e, ha’u garante katak sira sei dada bandeira iha eventu nasionál Asean University Games ne’e no lori fila medalla mai Timor-Leste,” Ricardo otimista.
Notísia relevante : Asian Games-Xanana kongratula Xina promove pás entre nasaun no atleta
Atleta hirak ne’e mai husi UNTL, Universidade Katólika Timorense (UCT, sigla portugés), Dili Institute of technology (DIT), Universidade da Paz (UNPAZ), no Universidade Orientál Timor-Lorosa’e (UNITAL).
“Ami la halo kompetisaun hanesan tinan-tinan ne’ebé mak hili atleta sira selesionadu tanba tempu la to’o, maibé ami harii komisaun ida no kada universidade aprezenta sira-nia atleta mai halo kompetisaun sein prémiu, depois ami prodús sertifikadu ba sira, depois sira tama TC mak treinu durante fulan-ida,” nia informa.
Atleta hamutuk 34 ne’ebé mai husi modalidade lima mak hanesan futsal mane 12, xadrez feto-mane haat, atletizmu feto-mane neen, taekwondo feto-mane neen no volley ball praia feto-mane neen sei partisipa iha Asean University Games 2024 ne’ebé sei realiza iha Surabaya no Malang, Indonézia.
Ministru Juventude, Desportu, Arte no Kultura (MJDAK), Nelyo Isaac Sarmento, apresia ho prezensa atleta sira ne’ebe sei kompete iha kompetisaun rejionál.
“Orgullu ho ita-boot sira-nia prezensa atu ba tuir kompetisaun iha Indonézia, espera katak ita-boot sira ba iha ne’ebá labele buka manán de’it maibé tenke buka apreende mós, ida-ne’e mak importante no reprezenta Timor-Leste ba mundu atu hatudu ba imi-nia alin sira oinsá mak bele dezenvolve liután Federasaun Desportu Akadémika iha Timor-Leste,” nia enkoraja.
Harii federasaun ne’e ho objetivu hakarak kria kompetisaun entre universidade no bainhira sai ona atleta nasionál tenke hatudu disiplina no respeita hodi bele inspira fali atleta sira tuir mai.
MJDAK hakarak iha kompetisaun entre universidade hotu iha Timor-Leste hodi halo selesaun hafoin maka ba partisipa jogu iha rai-li’ur, maibé tanba tempu la permite ona, tanba ne’e tinan oin mak atleta husi universidade barak liután atubele kompete, nune’e husu ba organizasaun no federasaun sira atu haree kestaun ne’e.
Reprezentante atleta, José da Costa, orgullu tanba bele selesionadu hotu atu ba tuir Asean University Games no nia parte garante katak sei lori fila medalla mai Timor Leste.
“Kuandu iha kompetisaun ida tenke lakon no ida manán, maibé ha’u ho kolega sira sei koko no esforsu-an ho kbiit ne’ebé ami iha atubele fila Timor la mamuk, signifika lori netik rezultadu ho medalla ne’ebé iha,” nia otimista.
Governu liuhusi MJDAK apoiu orsamentu ba preparasaun $55.000 no orsamentu ba partisipasaun $65.000.
Jornalista : Osória Marques
Editora : Julia Chatarina
