iklan

EKONOMIA, BAUCAU, HEADLINE, MUNISÍPIU

EDTL sei instala eletrisidade faze daruak ba aldeia 14 iha Baucau

EDTL sei instala eletrisidade faze daruak ba aldeia 14 iha Baucau

Xefe Unidade EDTL.EP Munisípiu Baucau, Edegar B. da Silva. Imajen Agência TATOLI/Natalino Belo.

BAUCAU, 24 juñu 2024 (TATOLI) – Eletrisidade Timor-Leste, Empreza Públika (EDTL.EP) munisípiu Baucau planeia kompleta instala eletrisidade faze daruak ba komunidade hamutuk aldeia 14 iha munisípiu Baucau.

Xefe Unidade Eletrisidade Timor-Leste, Empreza Publiku (EDTL.EP) Munisípiu Baucau, Edegar B. da Silva, esplika, husi suku 59 iha munisípiu Baucau maioria asesu ona eletrisidade, enkuantu hela aldeia 14 mak seidauk ne’ebé maihusi postu administrativu Baucau Vila, Vemasse, Baguia, Quelicai no Laga.

“Aldeia 14 nia dadus tama hotu ona, prosesu la’o hela ita-nia hakarak 2025 ahi tenke lakan,” Xefe Unidade EDTL Munisípiu Baucau hateten iha Vila Nova, segunda ne’e.

EDTL Baucau finaliza ona rekolla dadus no relata ona ba nasionál hodi hein prosesu kontinuasaun hanesan loke konkursu públiku antes kompañia manán-na’in halo serbisu iha terrenu tuir mapeamentu ne’ebé planeia ona.

Ekipa EDTL Baucau rekolla dadus tuir uma-kain ne’ebé ona estrada, no komunidade sira-seluk ne’ebé seidauk asesu estrada, tuir planu sei distribui solar panel ho gratuitu.

“Faze tuir mai ami haree fali ba aldeia sira tuir dadus 14 ne’ebé seidauk asesu eletrisidade,” Edegar da Silva akresenta.

Jestór EDTL.EP Baucau husu komunidade husi aldeia 14 nafatin hein no husu Autoridade Suku no Aldeia atu koopera bainhira prosesu serbisu iha ona terrenu nune’e bele finaliza tuir tarjetu iha tinan 2025.

Munisípiu Baucau hamutuk aldeia 281 husi suku 59 ne’ebé eziste iha Postu Administrativu neen.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!