VIQUEQUE, 25 juñu 2024 (TATOLI)-Servisu Guarda Floresta munisípiu Viqueque halo apreensaun ba kilat-manu hamutuk 13 ne’ebé komunidade sira uza hodi kasa animál fuik sira.
Atu konserva rekurusu naturál hanesan flora no fauna tuir Konstituisaun Repúblika Demokrátika Timor-Leste, iha artigu 139 kona-bá rekursu naturál, nune’e SEF sei servisu hamutuk Polísia Nasionál Timor Leste (PNTL) munisípiu Viqueque hodi asegura flora no fauna.
“Ita nia Guarda Floresta konsege halo apreensaun ona kilat manu hamutuk unidade 13. Governu bandu atu labele utiliza arma sira-ne’e hodi estraga biodiversidade. Tanba ne’e, kilat sira-ne’e ami sei intrega ba PNTL munisípiu Viqueque kontinua prosesa”, Sekretáriu Estadu Floresta, Fernandinho Vieira, hateten hafoin ramata entrega kilat manu ba autoridade seguransa, iha salaun postu administrativu Viqueque Vila, horisehik (tersa 25).
Haree ba animál fuik komesa menús ona, Sekretáriu dehan Guarda Floresta, PNTL no servisu hamutuk ho komunidade sira atu proteje biodiversidade sira-ne’ebé ejiste iha munisípiu Viqueque.
Komunidade sira-ne’ebé uza kilat-manu voluntáriamente entrega ba Guarda Floresta sira, karik uza tenke hetan lisensa husi parte Governu hodi nune’e ema labele kaer arma tuir ida-idak nian interese.
“Ha’u husu ba Guarda Floresta tenke kontinua servisu másimu hodi kontrola abitante sira-ne’ebé kasa animál fuik no kontrola mós komunidade sira-ne’ebé tesi ai horis abiru. Tanba ita tesi ai arbiru sei fó impaktu dezastre naturál nomós fó impaktu mós ba komunidade sira bainhira mosu inundasaun”. Nia hato’o.
Iha fatin hanesan, Reprezenta Komandante PNTL munisípiu Viqueque, Inspetór Xefe José Afonso, hateten kontinua kolabora ho Guarda Floresta sira hodi proteje flora no fauna iha Viqueque.
“Ba oin ami kontinua servisu hamutuk ho Guarda Floresta sira di’ak liután, to’o postu no suku sira hodi asegura ita-nia biodiversidade sira-ne’ebé iha munisípiu ida-ne’e”, nia promote.
Iha biban ne’e, Xefe Departamentu Floresta Viqueque, José da Silva, kompromete kontinua kontrola atividade ilegál sira iha munisípiu Viqueque ne’ebé estraga biodiversidade.
“Kilat-manu sira-ne’e ita-nia komunidade sira uza hodi kasa animál fuik sira, depois ita-nia Guarda Floresta sira la’o hetan hodi prende. Nune’e ohin ami entrega ba autoridade segurasa sira”,nia hato’o.
Daudaun Funsionáriu Guarda Floresta ne’ebé servisu iha munisípiu Viqueque na’in-21 ne’ebé destaka ba postu administrativu lima.
Disemina lei floresta
Administradór Postu Administrativu Viqueque Vila, munisípiu Viqueque, Leopoldo da Costa Alves, husu Sekretáriu Estadu Floresta (SEF), atu halo diseminasaun kona-ba lei floresta ba komunidade sira hodi bele komprende tanba maioria komunidade munisípiu Viqueque sira seiduak iha koñesementu.
“Tanba ne’e ita atu redús ema tesi ai arbiru no oho animál fuik sira-ne’e presiza halo sosializasaun ruma lei floresta nian ba komunidade sira iha baze. Tanba dala barak ita ko’alia de’it labele estraga biodiversidade, maibé lei sira ita-nia komunidade sira la hatene”, katak Leopoldo da Costa Alves.
Rekursu Guarda Floresta ne’ebé koloka iha munisípiu Viqueque menus, nune’e defisial atu kobre hotu área luhan purvolta kilométru kuadradu (km2) 1.872.7 , tanba ne’e presiza aumenta rekursu Guarda Floresta.
Hatan ba preokupasaun ne’e Sekretáriu Estadu Floresta (SEF), Fernandinho Viera, rekoñese katak kona-ba lei floresta no Dekretu-Lei liga ba floresta ne’ebé prodús ona, maibé ladun efetivu di’ak tanba seidauk halo sosializasaun ba komunidade sira.
“Ha’u mós rekoñese durante ne’e ita nunka halo sosialiasaun lei floresta no Dekretu-Lei sira-ne’ebé Parlamentu sira aprova. Hanesan dekretu-lei númeru 5/2016 kona-ba sistema nasionál área protejida, nune’e mós ita iha dekretu-lei númeru 4/2017 kona-ba rejime jerál floresta no Dekretu-Lei númeru 6/2020 kona-ba rejime protesaun no konservasaun biodiversidade nian. Ba lei sira-ne’e iha mós sasaun ba ema sira-ne’ebé viola. Tanba ne’e, ami hanoin ona ba oin sei halo soializasaun ba ita-nia komunidade sira hodi komprende lei sira-ne’e”. nia realsa.
Apoia ai-oan ba komunidade Lacluta
Entretantu, Administradór Postu Lacluta, munisípiu Viqueque, Pascoal Gama Martins, husu Sekretáriu Estadu Floresta (SEF) atu apoia ai-oan planta indústria ba komunidade Lacluta hodi kuda iha sira nia kintál.
“Komunidade Lacluta durante ne’e presiza ai-oan planta indústria hanesan sabraka, haas, rambutan, durian no seluk tán, tanba planta sira-ne’e ba futuru bele fó rendimentu ba komunidade sira. Tan ne’e, maka ami hanoin hakarak husu Sekretáriu Estadu Floresta hodi apoia ai-oan sira-ne’e tanba rai Lacluta bokur no rai mamuk barak”, nia aifrma
Alende ne’e, Postu antiga Lacluta rai ameasadu risku ba dezastre mós barak ne’ebé presiza tau atensaun hodi halo re-florestasaun, nune’e labele akontese rai hala’i hodi fó risku ba komunidade sira.
Iha fatin hanesan Xefe suku Dilór, Jacinto Ximenes, husu agradese ba SEF ne’ebé vizita postu Lacluta no suku Dilór lokaliza Vila presiza halo re-floresta hodi hamatak sidade Lacluta kuda ai ne’ebé iha fuan hodi fó benifisia ba komunidade sira.
Hatann ba preokupasaun ne’e Sekretáriu Estadu Floresta (SEF), Fernandinho Viera, hateten, vizita ne’e ho objetivu atu halo koordenasaun hodi konserva no halo protesaun ba rekursu floresta sira-ne’ebé iha postu administrativu Lacluta tanba papel SEF haree asuntu sira-ne’e.
“Ami sei tau atensaun ba foho Bibileo hodi halo re-florestasaun tanba foho Bibileo ne’e iha valór estatisika hodi fó benifisia ba komunidade sira. Ho preokupasaun sira-ne’e ami bele tau ba planu perioridade sira-ne’e”, Governante ne’e akresenta.
Jornalista : Vitorino Lopes da Costa
Editór : Florêncio Miranda Ximenes
