iklan

NASIONÁL, INTERNASIONÁL, DEFEZA, DILI, HEADLINE, POLÍTIKA

Ministru Defeza ho Xefe Governu diskute planu dezenvolvimentu F-FDTL

Ministru Defeza ho Xefe Governu diskute planu dezenvolvimentu F-FDTL

Primeiru-Ministru, Kay Rala Xanana Gusmão, hala'o enkontru ho Ministru Defeza, Donaciano do Rosário Gomes, iha Palásiu Governu Díli, tersa (25/06). Imajen Tatoli/Francisco Sony

DILI, 25 juñu 2024 (TATOLI) – Ministru Defeza (MD), Donanciano do Rosario Gomes ‘Pedro Klamar Fuik’, tersa ne’e, iha Palásiu Governu Dili, hasoru malu ho Primeiru-Ministru Kay Rala Xanana Gusmão, hodi relata prespetiva rua ne’ebé presiza atu dezenvolve iha FALINTIL- Forsa Defeza Timor-Leste (F-FDTL).

“Ha’u mai ho prespetiva iha área rua ne’ebé importante ba Primeiru-Ministru tanba área rua ne’e presiza dezenvolve iha F-FDTL, ba futuru ida mak haree liu ba situasaun atual ne’ebé akontese funu iha fatin fatin, ida mak mudansa klimátika iha fatin fatin,” Ministru ne’e hateten bainhira ramata enkontru ho Primeiru Ministru.

Timor-Leste hanesan nasaun soberanu iha F-FDTL no Forsa sira bele orienta ba iha atividade apoiu umanitaria, hanesan mudansa klimátika tantu iha rai laran no rai-liur forsa Timor-Leste nian bele fó apoiu.

“Mudansa klimátika hanesan udan, rai halai, bee-sa’e, bele iha kompartisipasaun ita nia forsa armada nian atu bele fó apoiu ba ita nia populasaun iha área espesifika ida ne’e atu bele ajuda ita nia estadu konstroi pás ne’ebé mak ita ko’alia, pás ne’ebé mak mundu hakarak,” Ministru ne’e tenik.

Alende ne’e, F-FDTL mós iha papél importante atu involve iha área espesifiku kona-ba saúde atu bele kontribui ba sosiedade hotu.

“Ida ne’e mak ba oin ita tenke haree oinsa atu prepara ita nia rekursu umanu orientadu ba iha prespetiva hirak ne’ebé ita iha ona,” nia tenik.

Tanba ne’e, Primeiru-Ministru orienta ba MD atu haree didi’ak atu lori forsa armada Timor-Leste nian atu pro ativu ho populasaun iha Timor-Leste no rejiaun ne’ebé Timor-Leste hola parte ba presiza bele fó apoiu liuliu iha dezastre naturál sira.

“Ita haree iha nasaun hotu iha mundu nunka promove pás, mosu konflitu barak, oinsa ita nia pozisaun, entaun ita nia pozisaun mak atu konstroi pás, ita atu fó apoiu ba sira oinsa mak atu kria pás,” nia tenik.

Iha ambitu hasoru malu ne’e, MD aproveita oportunidade hodi aprejenta aan hikas ba Primeiru-Ministru tanba durante fulan ida aujensia razaun kestaun saúde ne’ebé la saudavél.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!