OÉ-CUSSE, 26 juñu 2024 (TATOLI) – Asosiasaun Nasionál Produtór Fini Komersiál Timor-Leste (ANAPROFIKO-TL), tersa ne’e fasilita formasaun ba asosiasaun lima iha Rejiaun Administrativa Espsiál Oé-Cusse Ambeno (RAEOA).
Sekretáriu Jerál ANAPROFIKO-TL, Joanico José Ximenes, informa, formasaun ne’e ho matéria epesífiku rua, daruak hanorin agrikultór fini komersiál lima ne’e, kona-bá oinsá hakerek proposta atu hetan apoia no bele asesu ba orsamentu.
Daruak, kona-bá kontrolu kualidade fini, kapasita grupu agrikultór sira, atubele halo melloramentu ba iha produsaun fini iha Oé-Cusse.
“Tanba kada tinan ita-nia asosiasaun sira prodús hela fini maibé, oinsá atu fahe informasaun ba sira, bele garante nia kualidade no kuantidade fini, tanba asosiasaun lima ne’e, nu’udar membru permanente ANAPROFIKO,” Sekretáriu Jerál ne’e, hateten iha Oé-Cusse.
Notísia relevante: RAEOA harii asosiasaun no grupu ualu prodús fini komersiál
Nia fó sai, bainhira formasaun remata, ekipa ANAPROFIKO sei halo monitorizasaun ba asosiasaun sira, atu haree liu ba atividade no oinsa prodús fini, liuliu produsaun batar, fore-rai no foremunggu, nune’e bele motiva di’ak liután, atu prodús halo tratamentu fini, konservasaun fini.
“Agora iha territóriu nasionál atu estabelese ona asosiasaun hamutuk 76 ejiste iha munisípiu 12 no RAEOA iha lima (5), ne’e mak ita presiza fasilita formasaun ba sira,” nia fó-sai.
Formandu Natalia Falo, husi grupu Asosiasaun Eno-Naek suku Lifau, orgullu tanba matéria ne’ebé simu, nu’udar matadalan atu implementa iha atividade asosiasaun nian.
“Ohin ami hetan matéria barak, kona-bá moris fini nian ne’e liga ho rezultadu époka ne’ebé ami prodús kada tinan, no ami agradese tanba bele hatene hato’o proposta, atu husu apoia materiál liu-liu atu prezerva fini nian,” nia agradese.
Xefe Departamentu Agrikultura Bázika Familiár, Bernadino da Costa Nunes, konsidera formasaun ne’e importante atu hasa’e koñesimentu ba asosiasaun sira, nune’e bele iha mudansa ba produsaun fini.
“Formasaun ne’e importante atu hasa’e tán sira-nia koñesimentu kona-bá oinsá prodús fini kualidade atu kompete iha merkadu, rezulta kolleta époka 2023 to’o 2024, produtu batar estabelese ekatre 17 ba forerai ektare haat ho nia produsaun fini ne’ebé ami rekolla ona mínimu tebes tanba impaktu husi mudánsa inklim, nune’e ba batar variedade noi-mutin sira totál ne’e hetan tonelada hitu, ba forrerai-utamoa hetan tonelada ida,” nia orgullu.
Notísia relevante: WN tulun grupu feto 27 Oé-Cusse kuda hortikultura hadi’a rendimentu família
Entretantu, asosiasaun lima ne’e eziste iha Oé-Cusse desde 2015 envole uma uma-kain 119, mak hanesan asosiasaun Eno-Naek Lifau iha suku Lifau, no Mekosikaloti iha suku Naimeko sub-rejiaun Pante Makasar,
Asosiasaun Tasa’e Sele iha suku Usitasa’e sub-rejiaun Oésilo, Banofa iha suku Abani, sub-rejiaun Pássabe, asosiasaun Kisan Kalbikase iha suku Lela-Ufe, sub-rejiaun Nítibe.
Jornalista: Abílio Elo Nini
Editór: Evaristo Soares Martins
