DILI, 26 Juñu 2024 (TATOLI) – Entre Janeiru no Maiu, bebé hamutuk 1.095 mak moris no neen mate iha Sentru Saúde Comoro (SSC), informa Xefe SSC, Emília de Sousa.
“Iha mós bebé ne’ebé moris mai mate iha kabun laran kedas mak sira foin mai. Totál ema na’in-neen”, Emília de Sousa dehan ba Tatoli, iha Comoro, ohin.
Responsavel ne’e hateten husi númeru bebé sira ne’ebé moris ne’e, balun hetan komplikasaun no transfere bá Ospitál Nasionál Guido Valadares atu hetan tratamentu adekuadu.
“Iha inan 392 hetan komplikasaun oioin de’it. Problema labarik toba sala iha inan nia kabun, sezariana no pós-partu”, nia esplika.
Emília de Sousa salienta katak inan isin-rua sira, balun seidauk iha konxiénsia atu halo konsulta rotina iha sentru saúde sira. Tanba ne’e, nia husu ba inan sira hodi bá lalais sentru saúde sira atu hetan atendimentu husi profisionál saúde sira bainhira sente moras no besik atu partu.
“Kuandu sente moras, bee-manas mai, kabun-kidun no kotuk laran moras, tenke mai sentru saúde sira”, nia apela.
Jornalista: Jesuína Xavier
Editora: Maria Auxiliadora
