BOBONARO, 26 juñu 2024 (TATOLI) – Prezidente Repúblika (PR), José Manuel Ramos Horta, preukupa ho kondisaun infraestrutura sítiu turizmu Bee-Manas Marobo, suku Ilatlaun, postu administrativu Bobonaro, munisípiu Bobonaro ne’ebé daudaun ferrujen ona.
Horta hato’o preukupasaun ne’e hafoin halo akampamentu ho autoridade munisípiu Bobonaro no komunidade sira durante kalan ida iha sítiu turizmu bee-manas Marobo.
Prezidente Repúblika, argumenta obra ne’ebé Governu halo iha tinan hirak liubá kapás tebes, maibé laiha manutensaun no husik abandona, tanba ne’e nia prefere IX Governu liuhusi Ministériu Turizmu di’akliu entrega fali ba setór privadu husi nasionál no internasionál mak halo jestaun, nune’e bele esplora no promove sítiu turizmu ne’e ba mundu.
Notísia relevante: Tempu Badak MTKI Sei Simu Termu Entrega Husi SEFOPE Hodi Jere Bee Manas Marobo
“Ne’e osan oan ruma tama ba komunidade, sé ita la halo dezenvolvimentu turizmu ho kakutak, tanba fatin ne’e di’ak tebes, atu sai di’ak liután hadi’a tán estrada ne’e bele sai sentru saúde ida di’ak, tanba bee ne’e atu halo tratamentu moras kulit nian,” nia ko’alia iha suku Atuaben, kuarta ne’e.
Xefe suku Atuaben, Januário Mendonça, husu ba governu atu tau atensaun ba sítiu turizmu ne’e tanba kondisaun estrada no infraestrutura ferrujen hanesan ai-tahan karik namlaek hotu ona.
“Ida-ne’e sai hanesan problema boot, ha’u hanoin ida-ne’e mós sai hanesan prioridade ida,” nia katak.
Enkuantu bee-manas Marobo ne’ebé lokaliza iha foho llatlaun nia hún, iha munisípiu Bobonaro hori uluk kedas rekoñese nu’udar fatin destinasaun turístiku ho nune’e Sekretaria Estadu Polítika Formasaun Profisionál no Empregu (SEFOPE) liuhosi projetu Turizmu Komunitária reabilita no moderniza ona infrastrutura bázika hosi ninia orijinalidade.
Bee-manas Marobo reabilita hosi Sekretáriu Estadu Formasaun, Profesionál no Empregu (SEFOPE), Ilídio da Costa Ximenes iha 2015 ho totál kustu $498,860 no inagura iha loron 08 dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão.
Notísia relevante: Komisaun D Sujere Hadi’a Infraestrutura Báziku iha Bee Manas Marobo
Jornalista: Sérgio da Cruz
Editór: Evaristo Soares Martins
