DILI, 27 juñu 2024 (TATOLI)—Aplikante 42.000-resin husi aplikante rejistadu 55.436 vaga online serbisu iha Austrália, partisipa ona teste eskrita ne’ebé realiza husi Sekretaria Estadu Formasaun Profisionál Empregu (SEFOPE).
“Iha fulan-rua liubá ita realiza ona ezame eskrita ba ita-nia kandidatu traballadór hamutuk 42.000-resin molok tama faze kurije, ohin ita realiza enkontru ho Komisaun Funsaun Públika (KPF, sigla portugés), Komisaun Antí-Korrupsaun, Provedoria Direitu Umanu no Justisa (PDHJ, sigla portugés), hahú segunda semana oin ba leten halo koresaun ba rezultadu ezame esktrita,” Sekretáriu Estadu Formasaun Profisionál no Empregu, Rogério Araújo Mendonça, informa iha ninia knaar fatin, Caicoli, kinta ne’e.
Notísia relevante : Aplikante 2.508 vaga online Austrália tuir teste lian inlgés semana oin
SEFOPE envolve instituisaun oin-oin ho objetivu atu garante ninia kualidade, transparénsia iha selesaun hodi evita rumor sira iha rede sosiál kona-ba sistema familiarizmu.
“Sira-nia apoiu ka observa prosesu ba selesaun ezame eskrita ne’e hahú semana oin to’o ramata, ita esforsu kurije ba eskrita ne’e bele han semana rua, bainhira hotu bele fó sai ona rezultadu hodi hakat ba prosesu tuir mai,” nia tenik.
Jornalista : Arminda Fonseca
Editora : Julia Chatarina
