Empreza Korais Timor hetan ona lisensa husi Governu halo atividade futu-manu
DILI, 27 juñu 2024 (TATOLI)— Inspetór Jerál Jogu, Anibal Carvalho Martins, hateten katak durante ne’e empreza Korais Timor hetan ona lisensa husi Governu atu halo atividade futu-manu iha Kapitál Dili.
“Objetivu ita mai iha Empreza Korais Timor ne’e, tanba empreza ne’e legál no hetan lisensa husi Servisu Rejistu Verifikasaun Emprezariál (SERVE, I.P) no mós halo kontratu ho Inspesaun Jerál Jogus atu hala’o atividade futu-manu iha Dili,” Anibal Carvalho Martins ba jornalista sira hafoin halo inspesaun futu-manu iha Au-hun Becora ohin.
Inspetór ne’e dehan, durante ne’e futu-manu iha Dili barak tebes tanba ne’e ekipa husi Inspesaun Jerál Jogus tama sai bairru hodi identifika nune’e labele mosu problema sira.
“Durante ita haree katak iha Dili laran futu-manu barak tebes, hanesan iha bairru-bairru ne’ebé mak deskontrola tiha, entaun Inspesaun Jerál Jogus nia ekipa la’o tama sai bairru hodi identifika futu-manu sira ne’ebé mak iha, entaun hosi identifikasaun ne’e hatene katak iha Empreza Korais Timor mak hetan lisensa legál husi Inspesaun Jerál Jogus bainhira hala’o atividade futu-manu sempre selu taxa ba Estadu,” nia esplika.
Inspetór Jerál Jogu, Anibal Carvalho Martins relata, hahú iha fulan-novembru 2023, empreza lahalo atividade futu-manu tanba ema la mai iha ne’e, tanba atividade futu-manu mosu iha fatin-fatin, entaun atividade ida-ne’e halo di’ak mak tempu-badak Inspesaun Jerál Jogu halo regularizasaun ba atividade ida-ne’e.
“Hahú iha fulan novembru 2023 to’o agora atividade futu-manu la la’o tanba ema sira la mai iha ne’e, entaun futu manu mosu iha fatin-fatin komesa barak, nune’e ami hakarak atu regulariza atividade ida-ne’e mak tempu-badak ami regulariza ema sira ne’ebé mak futu-manu iha bairru sira mai futu iha fatin ida-ne’e no ami sei la autoriza futu-manu iha bairru sira,”nia akresenta.
Nia dehan, Inspesaun Jerál Jogu hamutuk ho Polisia Nasionál Timor-Leste servisu hamutuk ho instituisaun relevante sira atu kontrola másimu nune’e organiza futu-manu sira ne’ebé mak la iha kontratu ho Inspetór Jerál Jogus orienta sira futu -manu iha fatin ida-ne’e.
“Ita hotu hatene katak fatin sira ne’ebé mak deskontroladu ne’e ita la hatene taxa sira selu ba se, entaun espera katak sábadu 29 juñu futu-manu ida-ne’e hahú iha ne’e no Inspesaun Jerál Jogu hamutuk ho media atu fahe informasaun ba públiku katak fatin ida-ne’e mak fatin ofisiál no hetan kontratu ho Governu entaun hotu-hotu tenke mai futu iha ne’e,” nia afirma.
Nune’e nia husu ba empreza sira seluk atu loke futu-manu tenke rejistu iha SERVE, I.P no tenke koordena no kontratu ho Inspetór Jerál Jogu nune’e atividade ida-ne’e bele la’o legál.
“Liga jogu nian tenke rejistu ba iha Inspetór Jerál Jogu halo kontratu, entaun ida-ne’e mak foin halo atividade futu-manu tanba durante ekipa sira identifika futu-manu ilegál sira iha Dili laran hamutuk 12, tanba sees husi regra ne’ebé mak Inspetór Jerál jogus nian,” nia subliña.
Iha fatin hanesan, Empreza Korais Timor, Natalino Ferreira, agradese Inspetór Jerál jogus ne’ebé ba haree fatin no kondisaun ne’e iha Aldeia Au-Hun, Suku Becora, Postu Adminsitrativu Cristo Rei, Munisípiu Dili.
“Atividade futu-manu ida ne’e dook tebes hosi komunidade sira nia hela fatin no dook husi dalan públiku, entaun ami prepara fatin para motor, karreta nian no mós ba ema sira ne’ebé mak hakarak mai no kondisaun sira ne’e ami prepara di’ak tebes, tanba ne’e ami koordena ona ho ekipa ida atu mai futu-manu iha loron 29 no 30 juñu,” Natalino Ferreira informa.
Nune’e nia husu ba Inspetór Jerál jogu tenke kria lei ida atu regula futu -manu nune’e ema hotu ne’ebé mak loke atividade ida-ne’e bele selu taxa ba Estadu.
“Ita haree atividade futu-manu hanesan kultura ida ne’ebé mak sai dezenvolvidu liután, tanba ne’e presiza iha dekretu lei ida atu regula atividade ida ne’e nune’e ba oin atividade ne’e bele la’o ho di’ak,” nia konklui.
Jornalista : Felicidade Ximenes
Editór: Rafael Ximenes de A. Belo
