MCI realiza bazar kalan hodi komemora loron mundiál mikro pequena media empreza
DILI, 27 juñu 2024 (TATOLI) – Ministériu Komérsiu no Indústria (MCI) realiza bazar kalan hodi komemora loron mundiál mikro pequena media empreza nian ba dalahuluk iha Timor-Leste.
“Eventu ida-ne’e eventu importante tebes ba komemorasaun loron mundiál mikro pequena media empreza, ita foin hala’o dala uluk iha ita-nia rain, entaun loron ida ne’ebé mak importante tebes tanba mikro pequena no media empreza ne’e mak sai hanesan baze ba dezenvolvimentu setór ekonomia iha fatin hotu”, Vise Ministru Komérsiu no Indústria Agusto Trindade, informa bainhira loke bazar kalan iha Largo Lecidere, ohin.
Nia dehan, grupo ne’ebé partisipa iha feira ne’e hamutuk 27, mai hosi munisípiu sira hanesan Dili, Aileu Liquiça no seluk tan ne’ebé atu promove produtu lokál iha bazar kalan ida-ne’e.
“Ita bele haree iha fatin barak iha mundu, prova no hatudu bainhira empreza boot sira monu, maibé mikro pequena media empreza mak sei tane nafatin ekonomia. Tanba ne’e ita konvida grupu sira ne’ebé mak mai faan sasan iha ne’e hamutuk 27, entaun mikro pequena empreza ne’ebéselesiaona hosi kompetisaun negósiu inovativu ne’ebé realiza hosi MCI, KOICA no UNDP no ohin sira mai aprezenta sira-nia produtu mak hanesan balun restaurante, tais, mina nuu virjen, tua, kafe no produtu sira seluk ne’ebé ita iha.
Nia afirma, feira ne’e loke durante loron tolu, hahú 27 to’o 29 juñu, ho feira ne’e hanesan fó motivasaun ba mikro pequena media empreza sira atu fó biban ba sira hodi hala’o sira-nia negósiu ho di’ak.
Iha fatin hanesan, Prezidente Kámara Komérsiu Indústria Timor Leste (CCI-TL), Jorge Serano, hateten atu hasa’e produsaun rai laran mak Governu mós tenke promove efeitu pozitivu sira iha Timor-Leste.
“Ho feira sira hanesan importante tebes ba ita atu promove ita-nia hahan sira iha rai laran, tanba dala barak ita importa hahan mai hosi rai liur, maibé maluk sira iha inisiativa rasik promove mesmu kondisaun mínima no dezafiu barak, maibé sira konsege prodús buat balun iha rai laran hatudu katak ita-nia ekonomia iha baze komesa iha mudansa”, Jorge Serano essplika.
Diretór Nasionál Apoiu Dezenvolvimentu Mikro Pequena Medio no Empreza iha Ministériu Komérsiu no Indústria (MCI), Reinaldo Borges, hateten ho programa IX Governu Konstitusionál, Ministériu Komérsiu no Indústria ne’ebé toma responsabilidade ba Mikro Pequena Media Empreza nu’udar komponente importante ne’ebé bele transforma ekonomia nasaun nian liuhosi apoiu hodi dezenvolve no promove sira-nia produtu.
“Diresaun Nasionál Apoiu Dezenvolvimentu Mikro Pequena Media Empreza ho inisiatava ida kria bazar kalan hodi komemora Loron Internasionál ba Mikro Pequena Media Empreza hanesan dalan seluk ida mós hodi fasilita ka fó espasu ba empreza mikro, pequena no média sira atu bele halo atividades venda no promosaun ba sira-nia produtu”, Reinaldo Borges informa.
Nia dehan, selebrasaun ida-ne’e hanesan atividade dahuluk ne’ebé mak DNADMPME halo ho preparasaun tempu ne’ebé mak badak tebes, iha loron 19 juñu mak proposta hetan aprovasaun husi ministru hodi bele realiza atividade ida-ne’e no totál orsamentu ba atividade ne’e hamutuk $ 9,387.00.
Jornalista : Felicdade Ximenes
Editór : Zezito Silva
