Autoridade Viqueque destaka ona funsionáriu PASS na’in-144 ba suku 36
VIQUEQUE, 28 juñu 2024 (TATOLI)-Autoridade munisípiu Viqueque destaka ona funsionáriu Pesoál Apoiu Servisu Suku (PASS) hamutuk na’in-144 hodi apoia administrasaun suku 36 iha munisípiu Viqueque.
Tuir Diretór Servisu Asuntu Komunitária no Organizasaun Apoiu Sosiadade Sivil munisípiu Viqueque, Cosme Sarmento, esplika, funsionáriu PASS suku ne’e nu’udar funsionáriu Administrasaun Estatál ne’ebé koloka ba suku sira hodi haforsa sistema administrasaun suku.
“Tanba estatal halo rekrutamentu ba funsionáriu apoiu suku munisípiu Viqueque hamutuk na’in-144, ne’ebé ami halo ona destakamentu ba suku 36 iha munisípiu Viqueque foin lalais (kuarta loron 25 fulan Juñu 2024) ne’ebé agora funsionáriu sira hahú halo servisu iha suku ida-idak ne’ebé ami aloka ba”, Cosme Sarmento, hateten ba jornalista Agência Tatoli, iha resintu administrasaun Viqueque, ohin.
Ekipa Ministériu Administrasaun Estatál (MAE) oferese formasaun ba funsionáriu PASS na’in-144 durante loron rua iha munisípiu Viqueque, hafoin formasaun ne’e funsionáriu sira destaka ba suku ida-idak hodi fó atendementu ba komunidade sira.
Kona-ba destakamentu funsionáriu PASS kada suku ida hetan funsionáriu ida ba área sira hanesan sekretáriadu suku, finansa suku, sosiál suku no administrasaun suku ne’ebé sei fó atendementu ba komunidade sira área sira-ne’e.
“Ita-nia funsionáriu suku sira-ne’e hetan ona formasaun bázika liuliu área sira hanesan sekretáriadu, finansa, sosiál no administrasaun, hasa’e sira-nia koñesementu ita-nia komunidade sira iha suku. Ami rekoñese ekipamentu maka sei menus liuliu komputadór, maibé ba futuru sei haree fasilidade ba suku hodi funsionáriu sira uza”, nia hato’o.
Laiha fasilidade no fatin la susfisiente
Iha fatin ketak, xefe suku Irabin de Baixo, postu administrativu Uatucarbau, José Baptista do Carmo, hateten destakamentu funsionáriu na’in haat ba pozisaun sekretáriadu, finansa, sosiál no administrasaun munisípiu aloka mai ona suku, maibé difikuldade suku hasoru maka fatin limitadu no ekipamentu menus.
“Ami simu funsionáriu suku hamutuk na’in-haat no agora dadaun sira halo sira-nia servisu atendementu ba ita-nia komunidade sira. Maibé, difikuldade maka ami-nia fatin la sufisente tanba suku Irabin de Baixo sede suku kuartu rua entaun funsionáriu sira-ne’e okupa kuartu ida, ha’u kuartu ida, presiza aumenta sala ba funsionáriu sira. Depois ekipamentu ami iha komputadór ida no makína emprime (printer) ida ne’ebé funsionáriu sira uza lesuk de’it. Entaun, ha’u xefe suku labele uza, loos ne’e ha’u tenke uza komputadór ida hodi halo proposta ruma”, nia hato’o.
Tanba ne’e nia rekomenda ba Gonernu liuhusi MAE apoiu ekipamentu kompotadór ba funsionáriu PASS suku sira hodi uza no aumenta sala ba sede suku sira atu funsionáriu sira uza hodi halo atementu komunidade sira iha baze.
Jornalista : Vitorino Lopes da Costa
Editór : Florencio Miranda Ximenes
