iklan

EDUKASAUN, BAUCAU, HEADLINE, MUNISÍPIU

Ekipa konjunta halo inspesaun programa merenda eskolár iha Baucau

Ekipa konjunta halo inspesaun programa merenda eskolár iha Baucau

Diretór Edukasaun Munisípiu Baucau, Afonso dos Santos da Costa. Imajen Agência TATOLI/Natalino Belo.

BAUCAU, 26 juñu 2024 (TATOLI) – Ekipa konjunta Autoridade Administrasaun Munisipál halo inspesaun nu’udar parte monitoriza programa merenda eskolár iha munisípiu Baucau.

Ekipa konjunta referida konpostu husi Diresaun Edukasaun, Finansa, Saúde, Seguransa Alimentar, Aprovizionamentu no Serbisu Munisipál Agrikultura Baucau.

Diretór Serbisu Munisipál Edukasaun Baucau, Afonso dos Santos da Costa, esplika, ekipa halo monitorizasaun relasiona ho prosesu implementasaun programa merenda eskolár ne’ebé sai preokupasaun husi dirijente eskola sira hanesan oráriu ba hahan ne’ebé la tuir livru manuál.

“Ami Agora ami forma ona ekipa atu tún ba haree, atu monitoriza ba asuntu sira hanesan ne’e,” Diretór Serbisu Munisipál Edukasaun Baucau hateten iha Vila Nova, kuarta ne’e.

Ekipa konjunta ba monitorizasaun sei husu konfirmasaun direita ba Ekipa Jestaun Programa (EJP) Merenda Eskolár ne’ebé mak sai responsável hodi implementa programa referida bazeia ba livru manuál ne’ebé estabelese ona.

“Ami sei ba haree la’o-tuir manuál ka lae, hanesan preparasaun tuir menu, implementasaun orsamentu. Ekipa sei ba haree nia rezultadu depois mak ami fó sai fali,” Afonso akresenta.

Tuir oráriu durante monitorizasaun sei hahu husi Postu Administrativu Vemasse Baucau Vila, Baguia, Quelicai, Laga no Venilale.

Iha livru matadalan programa merenda eskolár kada semana fahe oráriu hanesan hosi loron-segunda, estudante sira sei haan etu, modo, na’an-bifi, mostarda no hudi tasak. Tersa-feira konsumu etu, manu-tolun, ai-farina tahan no ai-dila tasak.

Loron,-kuarta estudante sei haan etu, modo koto-mean, naan karau no xalada frutas, Kinta  haan etu no na’an, modo raba raba no es buah, enkuantu iha loron-sesta menu etu tempe tahu, fore sikoti no xalada frutas.

Programa referida implementa husi totál grupu EJP-merenda eskolár hamutuk 35, ho establesementu dapur hamutuk 181 ne’ebé monitoriza husi Serbisu Munisipál Edukasaun Baucau no dirijente kada eskola inklui superviziona husi inspektór eskola.

Totál benefisiáriu ba programa merenda eskolár iha munsípiu Baucau hamutuk estudante rihun 20-resin kompostu husi pre-eskolár hamutuk 41 no ensinu báziku hamutuk 253.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!