BAUCAU, 27 juñu 2024 (TATOLI) — Ensinu Sekundária Jerál (ESG, sigla portugés) Filiál Uailili, postu administrativu Baucau Vila, menus livru manuál hodi hala’o prosesu aprendizajen.
Profesór ba Asuntu Estudantil ESG Uailili, Romão Assunção Fátima Guterres, esplika, eskola hasoru difikuldade menus livru manuál iha kedas bainhira ezisténsia iha tinan 2020 nune’e difikulta estudante sira atu asesu referénsia kona-ba matéria aprendizajen.
“Livru balun iha ami fó, balun ami buka referénsia husi Google, ami download hodi print sai, fó ba ami-nia estudante sira,” Profesór Asuntu estudantil ESG Filiál Ualili ko’alia iha Baucau, kinta ne’e.
Livru manuál ne’ebé menus hanesan; língua melaiu, portugés, jeolojia, temas no literatura no seluk tán.
“Referénsia ne’e bainbain ami foti bazea ba livru manuál husi Ministériu Edukasaun nian, como laiha livru ami download,” Romão akresenta.
Diretór Serbisu Edukasaun Munisipál Baucau, Afonso dos Santos da Costa husu, dirijente eskola sira atu hato’o pedidu no foti direita iha edifísiu edukasaun Baucau, tanba livru manuál ba estudante no profesór daudaun sufisiente, nune’e bele fasilita estudante sira iha prosesu aprendizajen.
“Barak ou oituan importante mak sira mai foti, lato’o mak ita ba foti tán iha nasionál,” Afonso dos Santos hateten.
ESG Filiál Ualili rejista totál estudante hamutuk 268, kompostu husi primeiru to’o terseiru-anu.
Jornalista : Natalino Belo
Editór : Evaristo Soares Martins
