iklan

EDUKASAUN, BAUCAU, HEADLINE, MUNISÍPIU

Estudante ESG Filiál Ualili Baucau kontribui osan selu profesór voluntáriu

Estudante ESG Filiál Ualili Baucau kontribui osan selu profesór voluntáriu

Estudante Eskola Sekundária Jerál Filiál Ualili, postu administrativu Baucau Vila bainhira halibur hamutuk durante atividade aprendizajen. Imajen Agência TATOLI/Natalino Belo.

BAUCAU, 27 juñu 2024 (TATOLI) – Estudante sira husi Eskola Sekundária Jerál (ESG, sigla portugés) Filiál Ualili, suku Uailili, postu administrativu Baucau Vila, munisípiu Baucau, kontribui osan hodi halo pagamentu parsiál ba profesór voluntáriu sira iha eskola referida.

Profesór ba Asuntu Estudantíl ESG Filiál Uailili, Romão Assunção Fátima Guterres, esplika, desizaun referida hala’o relasiona ho eskola ne’e ida de’it profesór permanente na’in-ida no labele responde ba matéria hotu tanba menus profesór durante tinan-haat.

“Sira (estudante) ajuda netik profesór tempu parsiál no voluntariu sira,” Romão Assunção Fátima Guterres iha Uailili, kinta ne’e.

Estudante sira-ne’ebé eskola iha ESG Filiál Uailili kada fulan obrigadu tenke selu $5.00 nune’e bele hafasil prosesu aprendizajen hanesan aloka selu saláriu ba totál profesór voluntáriu no parsiál hamutuk na’in-14 bazea ba oras serbisu.

Romão Guterres, konsidera, osan ne’ebé estudante sira kontribui la’ós selu eskola maibé parte apoia eskola nune’e aguenta nesesidade profesór voluntáriu hodi kontinua kontribui hanorin iha eskola referida.

“Ita uza profesór voluntáriu no part time mai eskola ne’e difikulta, dalaruma ami-nia kbiit lato’o atu selu profesór sira,” Romão Guterres akresenta.

Jerente EgJ Filiál Uailili husu Governu liuhusi Ministériu Edukasaun no Serbisu Munisipál Edukasaun atu fó atensaun ba preokupasaun ne’ebé hato’o tanba bainhira estudante sira laiha kbiit atu selu, sei fó impaktu ba prosesu aprendizajen.

Diretór Serbisu Munisipál Edukasaun Baucau, Afonso dos Santos da Costa, konsidera kontribui osan ho montante boot inklui desizaun referida fo-sai husi eskola nune’e promete sei koordena ho dirijente eskola atu buka solusaun.

“Kontribuisaun ne’e loloos tuur hamutuk tetu hanesan eskola ne’e presiza profesór hira, depois mak deside,” Afonso argumenta.

Edukasaun Baucau rekoñese, problema menus profesór sai preokupasaun nasionál inklui iha Baucau, maibé situasaun referida Governu sei kontinua buka solusaun hanesan tempu besik sei halo rekrutamentu faze daruak liuhusi bolsa kandidatu iha.

ESG Uailili nu’udar eskola ne’ebé filiál ba Eskola Sekundária Jerál númeru 2 Vila Nova ho totál estudante 268, kompostu husi primeiru-anu to’o terseiru-anu.

Jornalista   : Natalino Belo 

Editór          : Evaristo Soares Martins

iklan
iklan

Leave a Reply

iklan
error: Content is protected !!