DILI, 28 juñu 2024 (TATOLI)—Prezidente Komisaun G ne’ebé trata asuntu Edukasaun, Juventude, Kultura no Sidadania iha Parlamentu Nasionál (PN), Armado dos Santos Lopes, hateten Governu iha dever fó bolsa estudu kbiit laek ba estudante sira husi família kbiit laek maibé presiza valór di’ak.
Notísia Relevante: Bolseiru bolsa hakbiit husi IES 17 la konkorda desizaun hamosu bolsa parsiál
“Governu iha dever obrigatóriu tenke apoia bolsu estudu kbiit laek ho objetivu atu ajuda ita-nia oan sira estudante mai husi família ne’ebé ekonomia kbiit laek duni,” nia hateten ba jornalista sira iha resintu Parlamentu, relasiona ho preokupasaun bolseiru bolsa hakbiit husi Institutu Ensinu Superiór hamutuk 17 iha rai-laran ne’ebé la konkorda desizaun Governu hamosu bolsa parsiál.
Nia dehan, preokupasaun husi alin sira bolsa hakbiit ne’e, no nia-parte ne’ebé hanesan mós mai husi baze, hahú husi profesór hafoin serbisu netik iha Diretór no agora daudaun reprezenta povu iha Parlamentu Nasionál, situasaun ne’e nia akompaña di’ak tebes iha baze.
Ne’ebé, polítika ida foufoun inísia ne’e, tanba haree kondisaun ekonomia povu liuliu inan-aman ne’ebé kbiit laek, oinsá sira bele kontinua fó kontinuasaun ba sira-nia oan sira hodi atu kontinua estudu.
Situasaun ne’e mak Governu iha dever obrigatóriu tenke apoia, ho objetivu atu ajuda estudante sira mai husi família ne’ebé ekonomia kbiit laek, hodi apoia para sira kontinua estudu hodi bele to’o iha universidade hodi sira iha kapasidade, ba futuru hetan serbisu no bele hadia sira-nia ekonomia uma laran rasik, hanoin ida-ne’e mak objetivu bolsu kbiit laek sira.
Notísia Relevante: MESSK fó kompeténsia FDCH regula prosesu implementasaun bolsa estudu kbiit-laek
“Maibé, realidade prosesu la’o, akompaña hanesan uluk profesór hafoin mós okupa diretór, katak hafoin Governu fó osan uitoan ba sira atu fó kbiit sira bele kontinua, entaun saida mak akontese, labarik sira uza ida-ne’e hodi halimar, depois objetivu ne’ebé Governu hakarak no objetivu ne’ebé inan-aman hakarak ita la atinje,” nia dehan.
Nia dehan, ho situasaun ida-ne’e mak se la sala karik Governu halo reflesaun ba situasaun ne’e bele fó subsídiu parsiál, ne’e siginifika la sala karik, atu fó ba ema-ne’ebé ekonomia fraku.
“Maibé, nia oan ne’e hakarak duni atu kontinua estudu to’o finaliza, duké ita labele fó de’it ba ema-ne’ebé ho kondisaun ladi’ak maibé nia mós la aproveita saida mak Governu di’ak ba futuru sira-nia. Di’ak-liu ita fó ba estudante sira-ne’ebé mai duni família kbiit laek duni, maibé nia oan ne’e hakarak duni atu kontinua estudu to’o finaliza,” nia hateten.
Notísia Relevante: Governu Konstitusionál da-sia revoga programa Bolsa Hakbiit
Jornalista : Nelson de Sousa
Editór : Cancio Ximenes
