DILI, 28 juñu 2024 (TATOLI) – Prezidente Bee Timor-Leste, Empreza Públika (BTL, E.P), Carlos Peloi, hateten kanu atu dada bee ba projetu empreza Pelican Paradise to’o ona.
Dirijente ne’e dehan BTL haruka ekipa sira identifika hotu ona fatin tau tanke no dada kanu bee, tanba ne’e sedu ka tarde sei dada bee ba projetu ne’e.
“Prosesu dada bee ne’e loloos halo ona iha tinan kotuk, maibé la konsege tanba BTL laiha kanu, entaun foin mak atu dada. Bee matan ne’ebé sei dada ba iha área projetu Pelican Paradise ne’e sei dada husi Tíbar mai, maizumenus kilómetru 1,4 no bee ne’ebé ita dada ba empreza sei sosa kada metru kúbiku selu $0,20”, nia adianta.
Rekorde katak BTL antes ne’e iha opsaun hodi fornese bee ba área projetu Pelican Paradise, ne’ebé hanaran Dili Sidade Istórika, ne’ebé lokaliza iha Tasi-tolu mak dahuluk, dada bee husi sistema ne’ebé fornese bee bá iha Portu Tíbar, daruak, BTL iha posu ida iha área Tíbar ne’e mak dada ba sira, no opsaun ikus mak BTL nia karreta tanke mak fornese bee ba sira.
Projetu Pelican Paradise halo investimentu estimadu iha millaun $700, prevee dezenvolvimentu komplexu turístiku ida, ne’ebé inklui otél sira, kampu golfe ida, abitasaun, sentru dezenvolvimentu ida ba joven sira, eskola internasionál ida, ospitál internasionál ida no sentru komersiál sira.
Empreendimentu ne’e abranje área ektare 558, ne’ebé sei halo reflorestasaun. Sei fó oportunidade serbisu ba ema 1.500 durante konstrusaun no kria postu traballu permanente1.300.
Notísia relevante: BTL, E.P iha opsaun tolu fornese bee ba projetu Pelican Paradise
Jornalista: Arminda Fonseca
Editora: Maria Auxiliadora
