Organizasaun Sagrada Família realiza konferénsia dahuluk iha Baucau
BAUCAU, 27 juñu 2024 (TATOLI) – Organizasaun Rezisténsia Sagrada Família (ORSF) kinta ne’e, realiza konferénsia dahuluk nível munisípiu iha Jináziu Vila Nova, Baucau.
Konselleiru ORSF, Lere Anan Timur, esplika, liuhusi konferénsia refereda atu estrabelese lideransa foun ne’ebé sei funsiona nu’udar estrutura foun hodi lidera ORSF ne’ebé ho objetivu prepara aan kontribui ba prosesu dezenvolvimentu iha Timor-Leste.
“Misaun sagrada família uluk liberta pátria, barak mate, agora sira-ne’ebé sei moris atu hatutan obra funu nian ba ukun aan,” Lere Anan Timur ko’alia iha Vila Nova, kinta ne’e.
Eis gerilleiu ne’e, fundamenta, ORSF nu’udar organizasaun rezisténsia ne’ebé durante tempu naruk kontribui ba prosesu ukun aan tanba ne’e rezultadu husi konferénsia sei sai parseiru hodi koopera di’ak liután ho Governu atu liberta povu iha tempu ukun-aan.
Lere Anan Timur konsidera espíritu patriotizmu no nasionalizmu husi juventude sira komesa mihis tanba foin moris iha faze ukun-aan, nune’e ezisténsia ORSF bele motiva joven sira, liuliu hasa’e koñesementu no buka aprende istória pasadu.
“Jerasaun foin sa’e sira-ne’e hanoin ukun-aan hanesan ita hetan de’it, maibé la hanoin ukun-aan ne’e konsekuénsia,” Lere Anan Timur akresenta.
Lere husu estrutura sagrada família ho membru tomak atu nafatin iha espíritu hodi kontribui ba prosesu dezenvolvimentu iha faze ukun-aan inklui kontinua hatutan istória luta ba jerasaun foun sira nune’e bele hasae espíritu nasionalizmu.
Prezidente Exekutivu ORSF Nasionál, Manuel Ximenes, esplika, konferénsia referida parte konsolidasaun entre membru sira atu nafatin hamutuk hanesan iha tempu rezisténsia no estabelese hikas estrutura iha nível munisípiu.
“Esperansa husi konferénsia ida-ne’e postu administrativu hotu iha Baukau enkoraja ho forte no unidu mai hamutuk hodi forma estrutura,” nia akresenta.
ORSF durante luta ba ukun rasik-aan kontribui liuhusi halibur forsa populár, hodi kontra invazaun militár Indonézia iha Timor-Leste nunee iha faze ukun-aan, kontinua iha komitmentu atu kontribui programa Governu nian, hanesan kria pás no amizade.
Husi konferénsia referida sei estabelese ekipa hodi buka hatene totál membru sagrada família ne’ebé sei ativu, kanek no mate iha funu laran.
Konferénsia dahuluk ORSF iha Baucau realiza durante loron-rua ne’ebé partisipa husi delegadu postu administrativu neen hamutuk 650, ho totál gastu orsamentu $12.457.00.
Jornalista : Natalino Belo
Editór : Evaristo Soares Martins
