Saúde Baucau rejista kazu moras matan 355
BAUCAU, 28 juñu 2024 (TATOLI) – Serbisu Munisipál Saúde iha tinan-ne’e rejista pasiente sofre moras matan hamutuk na’in-355 ne’ebé maihusi suku no postu administrativu sira.
Pasiente sira-ne’e rejista liuhusi fasilidade saúde sira iha nível suku no postu administrativu kompostu husi idade 0-18 hamutuk na’in-169 hanesan mane 81 no feto 88, idade 19-59 hamutuk na’in-117 kompostu mane 44 no feto 73 no pasiente husi idade 60 ba leten hamutuk na’in-69 kompostu mane 32 no feto na’in-37.
“Ita rejista kazu moras matan barak, entaun ita halo prevensaun sedu nune’e labele afeitadu ba moras matan,” Diretor Serbisu Saúde Munisípiu Baucau, Cristiano Cipriano Belo hateten iha Vila Antiga, sesta ne’e.
Husi númeru hirak-ne’e, fahe ba kategoria tolu hanesan matan haree la mos kompostu idade 0-18 na’in-ida, idade 19-59 hamutuk na’in-tolu no idade 60 ba leten hamutuk na’in-12 kompostu mane na’in-hitu no feto na’in-lima.
Tipu moras matan iha rua hanesan kataratas husi idade 0-18 hamutuk na’in-neen kompostu mane na’in-ida no feto lima, idade 19-59 hamutuk na’in-haat kompostu mane tolu no feto na’in-ida no husi idade 60 ba leten hamutuk na’in-14 kompostu mane 10 feto na’in-haat.
Enkuantu tipu moras seluk mak konjuntivitis husi idade 0-18 hamutuk 147 kompostu mane 71 feto na’in-76, idade 19-59 hamutuk 97 kompostu mane 34 no feto na’in-63 no idade husi 60 ba leten hamutuk na’in-39 kompostu mane na’in-13 no feto na’in-26.
“Ema hotu komprende ba prevensaun sedu, labele tama faze matan moras grave liu mak foin halo prevensaun,” Cristiano Belo akresenta.
Cristiano, esplika, problema hirak-ne’e akontense no afeita ba labarik idade kiik, tanba impaktu husu jenetika hahu husi inan nia kanotak ne’ebé lahetan nutrisaun diak, enkuantu idade reprodutivu impaktu husi insidente no asidente sira.
Serbisu Saúde Baucau, fahe oklu ba pasensia sira-ne’ebé konsideradu kategória ba grave, no kontinua koordena tekniku matan sira husi Hospital Rejional Eduardo Ximenes (HoREX) hodi apoia ba pesóal saúde sira iha Diresaun Servisu Munisipal liuhusi programa Kuidadu Saúde Matan (KSM) nune’e halo asisténsia ba komunidade sira iha baze.
Jornalista : Natalino Belo
Editór : Evaristo Soares Martins
