VIQUEQUE, 29 juñu 2024 (TATOLI)—Konsellu Nacional Juventude Timor-Leste (CNJTL, sigla portugés), Maria Dadi Magno, enkoraja joventude munisípiu Viqueque partisipa ativa iha prosesu dezenvolvimentu nasionál.
“Objetivu mak fó espasu ba joven sira hodi hasa’e koñesimentu iha edukasaun sidadania atu enkoraja joven sira hodi konvoka nafatin espiritu patriotizmu no nasionalizmu iha Estadu Repúblika Demokratika Timor Leste (RDTL),” Prezidente CNJTL, Maria Dadi Magno, hateten asuntu ne’e liuhusi semináriu ho tema “Edukasaun Sidadania Mak Dalan Hodi Ema Ba KomprEende Kona-ba Direitu no Dever Sidadaun Nian”, iha Viqueque, sábadu ne’e
CNJTL nia papél importante ba prosesu konstrusaun estadu no nasaun, papél ida tan maka oinsá ezisti, atualiza aan no fó motivasaun, enkoraja no dudu joventude sira hodi partisipa ativu iha prosesu konstrusaun estadu no nasaun ba dezenvolvimentu ne’ebé hetan legalizasaun husi joventude loriku assuwain sira
Tanba ne’e, CNJTL mai ho baze legál fundamentál konstituisionál artigu 19 ko’alia kona-ba dever no direitu ne’ebé Estadu fó espasu no konsidera joventude sira hodi partisipa iha edukasaun, kultura, saúde no formasaun sira seluk.
“Ohin ami realiza atividade ida-ne’e fó oportunidade ba joven sira oinsá joven sira bele prienxe oportunidade ida-ne’e, atu hatene kona-ba dever, direitu no liberdade ba ita-boot sira hanesan joven, estudante atu kontribui iha família, sosiadade, kreda no nasaun. Bainhira ita ko’alia kona-ba prosesu dezenvolvimentu, organizasaun ne’e mós hakerek nanis ona iha polítika nasionál joventude la’ós hakerek de’it,” nia dehan.
Maibé, nia dehan, CNJTL ajuda Governu no Estadu atu defende no elabora polítika nasionál joventude nu’udar polítika Governu, maibé ida-ne’e esforsu husi CNJTL oinsá atu mai ho vizaun Estadu hodi hateke no hatutan lian foinsa’e sira-nian.
Prezidente Autoridade Munisípiu Viqueque (PAM), Francisco C.S de Gonzaga Soares, hateten semináriu ne’e importante tebe-tebes ba estudante, juventude arte marsiál ho rituál no grupu kategoriál, joventude suku no estudante sira atu partisipa hodi kompreende sira-nia papél.
“Ha’u sente semináriu ne’e importante. Espera joven sira bele kompreende patriotizmu no nasionalizmu, tanba asuntu rua ne’e importante tebes. Tanba ne’e, ita presiza kompreende hodi labele entende sala patriotizmu no nasionalizmu sai fali radikalizmu no fanatizmu hodi halai sees husi espiritu patriotizmu no nasionalizmu,” nia dehan.
Semináriu ne’e partisipa husi reprezentante Prezidente Konsellu Kombatente Libertasaun Nasionál (CCLN, sigla portugés) munisípiu Viqueque, reprezentante Komandante Polísia Nasionál Timor Leste (PNTL) munisípiu Viqueque ho Adjuntu Komandante PNTL Eskuadra Postu Viqueque Villa, Diretór servisu munisipál, konsellu joventude suku, reprezentante grupu arte marsiál, arte rituál ho grupu kategoriál no estudante ensinu sekundáriu jerál Calixa, 04 de Setembru ho Cristal.
Jornalista : Vitorino Lopes da Costa
Editór : Cancio Ximenes
