DILI, 01 Jullu 2024 (TATOLI)–Asosiasaun Protestante Timor-Leste (APTL) organiza semináriu hodi reativa espíritu juventude timoroan no sarani sira ho tema “Bolu Maromak Atan hodi Servi”; Hodi Haburas Povu no Juventude Sira Liuhusi Rekonsiliasaun Espirituál” Kultura Reavivamentu Espíritual”.
Prezidente Asosiasaun CBMC, Claricia Lay, esplika objetivu husi semináriu mak bolu Maromak atan sira no haburas joven timoroan sira hodi servi Maromak liuhosi haklaken evanjellu, tanba Maromak mak salva ema liuhosi Jesus Kristu.
“Ita-nia semináriu sei la’o durante loron tolu ho tema iha Bahasa Indonésia karik dehan kebangunana Rohani ba atan ka sarani Maromak nian. Ida-ne’e mós fó esperansa no ânimu ba sarani sira,” Claricia Lay, hato’o ba jornalista sira iha semináriu ne’ebé realiza durante loron tolu iha edifísiu CBMC, loja Jacinto iha Kuluhun, segunda ne’e.
Tuir nia, semináriu iha benefísiariu ba sarani sira hotu liuliu joven sira hodi ema-nia moris di’ak liuáan ho fiar, ema sein fiar bele la’o mamuk ka lakon esperansa.
Tanba, mundu teknolójia halo ema barak lakon sira-nia fiar, ladún iha respeitu no dook husi inan-aman, ho ida-ne’e nia impaktu mak mosu soe bebe, oho aan no oho malu iha Portugal.
“Tan ne’e mak ho pastor Indonézia mai iha ne’e, ita hamutuk fó forsa ba malu hodi kore buat sira ne’e,´ nia dehan.
Clarisa Lay hateten, partisipante sira-ne’e mai husi Nusa Tengara Timur-Indonézia no timoroan ne’ebé hetan apoiu finanseira hosi emprezáriu Austrália no Xina.
Prezidente mós informa sei iha atividade konsertu kalan rua iha Portu Dili hodi bele iha animasaun muzika espirituál ba joven sira, kantór sira konvidadu hosi Kupang-Indonézia no Jakarta.
Iha fatin hanesan, oradór hosi Indonézia, Pastor Yanvantius Tulai M.TH, hatete sei aprezenta variedade tópika ba sarani sira kona-ba evanjelizasaun, kultu no problema espirituál.
“Iha loron dahuluk semináriu sei ko’alia kona-ba xamamentu no responsabilidade ba partisipante sira hodi hatene, atu bele serbí no oinsá bele evanjeliza Biblia ba ema atu koñese Jesus Kristu,” nia hateten.
Pastor Yanvantius Tulai M.TH reforsa, semináriu ne’e mós atu introdús ba partisipante sira oinsá atu estuda no aprende rasik biblia hodi bele halo evanjelizasaun.
Iha loron ikus, semináriu ne’e mós sei ko’lia oinsá ema-ne’ebé hetan problema espirituál no bele hasai ema sira-ne’e husi forsa diabu nian katak Poder Jesus Kristu boot-liu hodi hasees aan husi diabu,” nia hateten.
Jornalista : Jesuína Xavier
Editór : Cancio Ximenes
