DILI, 01 jullu 2024 (TATOLI) – Ekipa konjunta ne’ebé lideradu husi Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, halo apreensaun ba veíkulu sira ne’ebé fa’an iha espasu públiku iha tasi-ibun aldeia Terra Santa, suku Madohi.
Sekretáriu Estadu hateten asaun ne’ebé ekipa SEATOU halo ne’e nu’udar atividade rotina no apreensaun ba viatura sira ne’e tanba, antes ne’e, fó ona avizu, maibé negosiante sira la rona hodi kontinua fa’an karreta iha fatin referidu.
“Ohin, ita hamutuk ho Poliísia Nasionál Timor-Leste (PNTL), liuhusi Tranzitu mai foti sai veíkulu sira ne’ebé ita-nia maluk sira fa’an hodi okupa espasu públiku iha tasi-ibun ne’e, karreta 14 no motór 17, entaun veíkulu hamutuk 31”, Germano Santa Brites Dias informa ba Tatoli, ohin.
Nia hatutan apreensaun ne’ebé halo iha tasi-ibun, iha aldeia Terra Santa ne’e importante tanba fatin ne’e empreza sei dudu halo tetuk ba preprasaun vizita Papa Francisco nian.
“Veíkulu ne’ebé ohin ekipa foti sei tau hamutuk hotu iha Portu Dili no sei haruka karta ba Ministériu Administrasaun Estatál (MAE) mak foin foti desizaun, tanba maluk vendedór sira la kumpre regra sira ne’ebé iha”, governante ne’e afirma.
Iha sorin seluk, Komandante Polísia Nasionál Timor-Leste (PNTL) munisípiu Dili, Superintendente Xefe, Orlando Gomes, hateten prezensa parte seguransa atu apoia SEATOU nian serbisu, tanba PNTL mós hola parte iha ekipa konjunta.
“Ami-nia prezensa iha terrenu ohin ne’e, aleinde mai halo operasaun konjunta ho SEATOU, parte Tranzitu mós halo pasa-revista ba transporte públiku iha Tasi-Tolu, entaun motór ne’ebé ami halo pasa-revista ne’e haat, ami sei lori bá munisípiu Dili no ekipa SEATOU halo aprensaun [ba viatura] 31 sei lori bá Portu Dili”, dehan.
Nia esplika katak veíkulu 31 ida ne’e tenke tau iha Portu Dili tanba ida la kategoria pasa-revista nian, maibé ne’e foti husi atividade operasaun konjunta nian.
“Tuir lei, sira ne’ebé ita foti husi pasa-revista ne’e sei selu multa, maibé operasaun SEATOU nian sei asegura iha Portu Dili. Karik fó orden dehan halo pasa-revista mak ami halo, maibé la’e ne’e desizaun husi SEATOU”, nia realsa.
Iha fatin hanesan, vendedór Martinho Amaral dehan negósiu ne’ebé nia hala’o ne’e tinan ida ona no admite katak hetan ona avizu dalabarak husi ekipa SEATOU, maibé nesesidade família nian obriga hodi kontinua fa’an viatura iha fatin ne’e.
“Sente triste tanba ekipa SEATOU mai foti ami-nia sasán. Desizaun saida mak sira atu fó, ami simu de’it, maibé ami mós karik bele husu Governu kria kondisaun ba ami hodi uza halo negósiu no bele selu taxa ba Estadu”, nia sujere.
Jornalista: Arminda Fonseca
Editora: Maria Auxiliadora
