DILI, 01 jullu 2024 (TATOLI) – Ministru Justisa Sergio Hornai, hateten, ekipa tékniku husi Ministériu Justisa (MJ), daudaun ne’e, koordena ona ho parte Komisaun Nasionál Aprovizionamentu (CNA, sigla portugés) no Sekretariadu Grande Projetu hodi ko’alia kona-ba futuru instalasaun ba Sentru Juvenil.
“Servisu sira, ita koordena hela ho sekretariadu tékniku grande projetu, ita servisu ho CNA tanba buat sira ne’e desentraliza iha ne’ebá, entaun ita presiza halo koordenasaun tékniku. Ita tenke servisu ho sira hodi sai hanesan parseiru ho sekretariadu grande projetu atu fó ezekusaun ba projetu Sentru Juvenil ne’e,” Sergio Hornai hateten ba jornalista sira hafoin enkontru Konsellu Konsultivu Ministériu Justisa iha salaun Ministériu Justisa Colmera, segunda, ohin.
Hornai dehan, Ministériu Justisa halo hela levantamentu ba rai ho objetivu atu instala Sentru Juvenil.
“Rai ne’e ita identifika ona iha área Tibar ne’ebá. Ekipa halo hela levantamentu no semana oin sira sei atualiza mai ha’u kona-ba rezultadu levantamentu ne’e no ha’u iha serteza absoluta katak pelumenus to’o iha fim dezembru tinan ne’e, projetu ida-ne’e bele la’o”, nia adianta
Governante ne’e husu ba kargu xefia husi Ministériu Justisa atu halo tuir orientasaun sira hotu no tenke hatudu servisu atu bele halo dezenvolvimentu ba projetu sira ne’e ho di’ak.
“Ha’u sempre husu mak ne’e, tenke kaer ba rejime juridiku aprovizionamentu, nune’e mós ba rejime kontratasaun públika atu buat sira ne’e bele la’o di’ak no pelumenus to’o iha fim dezembru tinan ne’e, projetu ida-ne’e bele lao”, nia afirma.
nia hateten, orsamentu ba konstrusaun Sentru Juvenil ne’e foti husi osan kapitál dezenvolvimentu hosi Orsamentu Jerál Estadu Ministériu Justisa ba 2024.
“Orsamentu ida-ne’e, ita iha bo’ot uitoan, besik millaun $ ida, maibé ba ida-ne’e, ita sei prepara ba tenderizasaun atu iha kompañia vensedór ida atu ita bele hahú projetu ida-ne’e”, nia konklui.
Jornalista: Natalino Costa
Editór : Zezito Silva
