DILI, 28 Junu 2024 (TATOLI)–Ministériu Edukasaun liuhosi ninia kuadru pessoál sira daudaun ne’e, destaka ona bá terrenu hodi identifika problema menús profesór sira ne’ebé oras ne’e akontese iha eskola sekundária no eskola sekundáriu no tékniku vokasionál sira iha Dili.
“Daudaun ne’e, ami-nia Diresaun Nasionál Ensinu Sekundáriu Jerál no Ensinu Tékniku Vokasionál ninia kuadru pessoál hahú ona bá eskola sekundáriu hotu-hotu iha Munisípiu Dili hodi halo identifikasaun ba menus profesór,” Diretora Jerál ME, Cecília Assis ba TATOLI, iha ninia servisu fatin Vila-Verde, Dili, sesta ne’e.
Alende iha Dili, nia dehan, tuir planu iha tempu badak sei desloka mós bá munisípiu hotu-hotu hodi identifika problema hanesan atu Ministériu Edukasaun tau iha ninia planu rekrutamentu ba profesór foun.
“Liuhusi kuadru pessoál mak bele deside no halo rekrutamentu depois koloka tuir eskola ne’ebé presiza. Ita labele tuur naran halo, buat hotu-hotu presiza identifikasaun, análiza hafoin deside, ida-ne’e importante ba Ministériu Edukasaun”, nia dehan.
Tanba ME iha ona planu rekrutamentu profesór ba tinan 2024 hamutuk 2.400, hosi numeru ne’e alende rekruta profesór ba ensiñu báziku sira, sei rekruta mós ba ensiñu sekundária jerál no ensiñu sekúndariu no tékniku vokasionál.
“Ida-ne’e sei loke faze datoluk iha fulan-agostu no setembru ba oin, tanba ne’e alvu 2.400 la’ós de’it ba vaga pre-eskolár ka ensinu báziku primeiru no segundu siklu maibé inklui mós ba ensinu sekundáriu,” nia hatutan.
Kona-ba kestaun menus profesór, daudaun ne’e akontese iha Eskola Ensiñu Sekundáriu Jerál (ESJ), Fitun Naroman (FINANTIL) laiha profesór atu hanorin matéria lián portugués, tetúm no multimédia.
“Maski ami menus profesór ba matéria tolu ne’e tanba profesór sira kaer matéria ne’e moras grave ona, maibé ami nafatin buka meiu hodi kedas, nune’e labele difikulta prosesu aprendizajen tanba ezame besik ona. Ho ida-ne’e ami mós halo ona pedidu ba ME atu koloka profesór na’in-tolu ba matéria ne’ebé laiha ne’e no ami hein katak bazeia ba pedidu ne’e ba terseiru períodu profesór hirak-ne’e bele kompletu”, Diretór Eskola Ensinu Sekundáriu Jerál (ESJ) Fitun Naroman Timor-Lorosa’e (FINANTIL) Aniceto Barlelo hateten ba TATOLI, iha Comoro Dili.
Eskola ESJ Finantil iha estudante hamutuk 1.700, ho ninia profesór 67, no saladeaula 18.
Jornalista: Osória Marques
Editór : Agapito dos Santos
