SEKoop presiza apoiu fundu no kapasita membru kooperativa sira
VIQUEQUE, 01 jullu 2024 (TATOLI)- Prezidente Kooperativa Uniaun Kréditu Brigada Fitun Foinsa’e (UKBFF) iha munisípiu Viqueque, Agustu Pinto, husu Governu liuhusi Sekretariu Estadu Kooperativa (SEKoop), atu apoia finanseiru no kapasita membru kooperativa sira hodi dezenvolve aan.
“Ohin loron mundiál ba kooperativu, nune’e ami-nia esperansa ba Governu presiza halo polítika ida hodi apoiu finanseiru no apoiu kapasitasaun ba kooperativa sira. Atu nune’e ba futuru kooperativa bele sai forte no la’o di’ak, tuir patraun kooperativa internasionál”, Agusto Pinto, hateten Agência Tatoli, iha postu Viqueque Vila, ohin.
Tanba Kooperativa UKBFF eziste iha tinan 2022 to’o agora hetan ona kapasitasaun ba jestaun, maibé kapasitasaun sira-ne’e seidauk másimu ne’ebé Governu tenke tau importansia.
Governu presiza tau importansia ba kapasitasaun, maibé depende ba polítika kada Governu ida-idak nian perioridade balun fó liu ba kreditu no balun fó perioridade ba Kooperativa Agrikultura. Tanba ramu kooperativa eziste iha Timor Leste hamutuk 16.
“Ami-nia haree di’ak, maibé tau matan ba ramu kooperativa sira hotu. Se ita tau perioridade ba kooperativa balun, entaun ninia implikasaun ba kooperativa sira-ne’ebé la tau ba perioridade”, nia prefere.
Kooperativa UKBFF ho ramu kréditu, maibé ho ninia estratejia rasik halo atividade agrikultura hodi fó oportunidade ba membru kooperativa atu hasa’e produtu agrikola no bele folin iha merkadu no halo kooperasaun ho ajénsia sira liuliu kapasitasaun no apoia rekursu materiál.
“Durante ne’e ami-nia atividade maka rai no empresta Osan ami hili uniaun kréditu tanba hakarak iha kreditu ne’ebé besik liu no birokrasi ne’ebé badak. Osan funan sei fila-fali ba membru sira. Ho investimentu ki’ik ne’e atu ajuda maluk seluk hodi bele impresta atu halo negosiu ruma. Nune’e mós ami bele akumula produtu membru nian hodi lori ba merkadu”, nia akresenta.
Progresu ezisténsia kooperativa UKBFF rejistu tiha ona iha notáriado no hetan tiha ona númeru TIN husi ministériu Finansa, kooperativa UKBFF hetan ona formasaun husi Sekretáriu Estadu Koperativa (SECOOP), no hetan ona Apoia husi Catholic Relief Service (CRS) ne’ebé liuhusi parseiru Fundasaun Knuar Habera Komunidade (F-KHK) hari’i ona sede ba kooperativa, apoia ekipamentu komputadór, meza, armáriu no printer ba kooperativa.
UKBFF fó ona kréditu ba membru 70 no baze legal husi Dekretu-Lei númeru 16/2004, la autoriza ba ema husi li’ur halo kréditu iha UKBFF.
Daudaun ne’e, kooperativa UKBFF fó ona kreditu ba membru sira no kooperativa iha ona fundu kuaze $20.000.00 .
Kona-ba kooperativa UKBFF kada fulan membru hotu tenke mai deposita sira-nia osan iha sentru Kooperativa no bele halo pedidu empresta tuir nesesidade membru nian. Ho jurus (osan funan) ne’ebé UKBFF fó ba membru sira ho 3%.
Jornalista : Vitorino Lopes da Costa
Editór : Florencio Miranda Ximenes
